Ukraynanın sabiq Prezidenti Viktor Yuşenko Ukraynaya göstərilən dəstəyə, humanitar yardıma, ukraynalı uşaqların reabilitasiya proqramlarına, eləcə də ölkəsinin suverenliyinə və ərazi bütövlüyünə göstərilən hörmətə görə Azərbaycan Prezidenti İlham Əliyevə və Azərbaycan xalqına təşəkkür edib.
Qanuntv.az xəbər verir ki, Viktor Yuşenko bu barədə "Facebook" sosial şəbəkə hesabında Bakıya etdiyi son səfərlə bağlı paylaşımında bildirib.
Yuşenko qeyd edib ki, Prezident İlham Əliyevlə onu 20 ildən artıq davam edən şəxsi dostluq və Ukrayna-Azərbaycan münasibətlərinin möhkəmləndirilməsi istiqamətində birgə fəaliyyət birləşdirir.
O, Azərbaycanla Ukrayna arasında strateji tərəfdaşlığın, qarşılıqlı etimad və hörmətin bundan sonra da iki ölkənin birgə fəaliyyətində öz əksini tapacağına əminliyini ifadə edib.
Viktor Yuşenko Azərbaycan xalqı ilə dostluğunun 1989-cu ildə Naxçıvanda ümummilli lider Heydər Əliyevlə tanışlığı və dostluq münasibətlərinin qurulması ilə başladığını bildirib.
Keçmiş Ukrayna Prezidenti iki ölkə arasında münasibətlərin inkişafının mühüm nəticələrindən birinin strateji tərəfdaşlığın rəsmən təsbit edilməsi olduğunu vurğulayıb.
O xatırladıb ki, 2008-ci il mayın 22-də Prezident İlham Əliyevin Kiyevə rəsmi səfəri çərçivəsində Azərbaycan və Ukrayna arasında dostluq və strateji tərəfdaşlıq haqqında Bəyannamə imzalanıb.
Yuşenkonun sözlərinə görə, həmin sənəd iki ölkə arasında münasibətlərin strateji xarakterini müəyyənləşdirib və gələcək əməkdaşlığın inkişafı üçün möhkəm əsas yaradıb.
Sabiq dövlət başçısı Bakıda keçirilən son görüş zamanı Azərbaycan və Ukraynanın gələcəyi, ikitərəfli əməkdaşlığın inkişafı və komandaların hazırlanması istiqamətində həyata keçiriləcək konkret layihələrin də müzakirə olunduğunu bildirib.
Viktor Yuşenko paylaşımında Azərbaycan və Ukrayna arasında mövcud dostluq münasibətlərinin və strateji tərəfdaşlığın bundan sonra da inkişaf etdiriləcəyinə əminliyini ifadə edib.
