Azərbaycan Respublikasının Prezidenti İlham Əliyev avqustun 18-də Böyük Britaniya və Şimali İrlandiya Birləşmiş Krallığının Azərbaycana yeni təyin olunmuş fövqəladə və səlahiyyətli səfiri Dankan Normanı qəbul edib.
Qanuntv.az xəbər verir ki, səfir etimadnaməsini dövlətimizin başçısına təqdim edib.
Dankan Norman çıxışına Azərbaycan dilində başlayaraq 27 il əvvəl həyat yoldaşı Kerri ilə birlikdə ilk dəfə Azərbaycana gəldiklərini xatırladıb. O, həmin vaxt ölkəmizdə insanların mehribanlığının və Bakının böyük inkişaf potensialının onları heyran etdiyini bildirib. Diplomat ötən illər ərzində Azərbaycanın böyük inkişaf yolu keçdiyini vurğulayaraq ölkələr arasında münasibətlərdə yeni səhifənin açılmasında iştirak etməkdən şərəf duyduğunu deyib.
Səfir Azərbaycan ilə Birləşmiş Krallıq arasında yeni strateji tərəfdaşlıq istiqamətində işlərin davam etdirildiyini diqqətə çatdırıb. Onun sözlərinə görə, bu əməkdaşlıq ortaq prioritetlər üzrə əlaqələrin dərinləşdirilməsinə, təhlükəsizliyin gücləndirilməsinə və innovasiyalar sahəsində əldə olunan nailiyyətlərin daha da inkişaf etdirilməsinə imkan yaradacaq.
Dankan Norman bərpaolunan enerji, müdafiə və aviasiya sahələrində Azərbaycanla dinamik tərəfdaşlıq qurmaq niyyətində olduqlarını bildirib. O, həmçinin təhsil sahəsində əlaqələrin inkişafını və gənclər arasında əlaqələrin möhkəmləndirilməsinin əhəmiyyətini qeyd edib.
Böyük Britaniyanın Azərbaycanda və Ermənistan arasında sülh prosesini dəstəklədiyini vurğulayan səfir Prezident İlham Əliyevin regionda davamlı sülhün yaradılması istiqamətində səylərinin Birləşmiş Krallıq Hökuməti tərəfindən yüksək qiymətləndirildiyini bildirib.
Dunkan Norman Azərbaycanın mina təhlükəsinin aradan qaldırılması istiqamətində həyata keçirdiyi fəaliyyətə də toxunaraq Birləşmiş Krallığın ölkəmizin minatəmizləmə səylərini dəstəkləyən ilk beynəlxalq tərəfdaşlardan biri olduğunu xatırladıb.
Prezident İlham Əliyev səfirə Azərbaycanda fəaliyyətinə uğurlar arzulayıb və onun Azərbaycan dilində çıxış etməsini yüksək qiymətləndirib.
Dövlətimizin başçısı gündəlikdə duran məsələlərin yalnız Azərbaycan-Böyük Britaniya münasibətləri baxımından deyil, eyni zamanda regionda inkişaf və əməkdaşlığın genişləndirilməsi baxımından mühüm əhəmiyyət daşıdığını bildirib.
Prezident İlham Əliyev minatəmizləmə sahəsində göstərilən dəstəyə görə Böyük Britaniya Hökumətinə minnətdarlığını ifadə edib. Dövlətimizin başçısı Azərbaycanın bu istiqamətdə daha sıx beynəlxalq əməkdaşlığa ehtiyac duyduğunu vurğulayıb.
Azərbaycan-Böyük Britaniya əməkdaşlığının 30 il əvvəl məhz enerji sahəsində başladığını xatırladan Prezident İlham Əliyev hazırda bərpaolunan enerji sahəsində də geniş tərəfdaşlıq imkanlarının mövcud olduğunu deyib. Bu baxımdan dövlətimizin başçısı işğaldan azad edilmiş ərazilərdə bp tərəfindən ilk Günəş elektrik stansiyasının inşa edilməsini mühüm nümunə kimi qeyd edib.
Prezident İlham Əliyev Azərbaycanın müstəqilliyinin 35 ili ərzində yalnız bir ilinin sülh şəraitində keçdiyini bildirib və hazırkı sülh mühitinin region üçün böyük dəyişiklik olduğunu vurğulayıb.
Dövlətimizin başçısı qeyd edib ki, regionda mövcud vəziyyət nəzərə alınaraq təhlükəsizlik məsələləri Azərbaycanın gündəliyində prioritet olaraq qalacaq.
Ölkədə əlverişli investisiya mühitinin yaradıldığını diqqətə çatdıran Prezident İlham Əliyev Azərbaycan və Böyük Britaniya şirkətləri arasında qarşılıqlı marağın yüksək olduğunu bildirib.
Görüşün sonunda Prezident İlham Əliyev Dankan Normana diplomatik fəaliyyətində uğurlar arzulayıb.
