Azərbaycanda xüsusi karantin rejiminin müddətinin uzadılması quru sərhədlərin açılması ilə bağlı müzakirələri yenidən gündəmə gətirib. Cəmiyyətin bir hissəsi sərhədlərin bayram ərəfəsində və ya 2026-cı ilin əvvəlində açılacağını gözləsə də, rəsmi qərar bu gözləntiləri doğrultmayıb.

Globalinfo.az-a açıqlama verən Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Elman Məmmədov bildirib ki, quru sərhədlərin bağlı qalmasının ciddi və əsaslı səbəbləri mövcuddur.

Onun sözlərinə görə, bu səbəblər əsasən təhlükəsizlik məsələləri ilə bağlıdır:
“Quru sərhədlərin bağlı saxlanılması təhlükəsizlik baxımından vacibdir. Eyni zamanda, müəyyən infeksion xəstəliklərin yayılma riski də nəzərə alınır. Aydındır ki, sərhədlərin qapalı olması dövlətlərarası gediş-gəlişi çətinləşdirir. Bu vəziyyət xüsusilə Gürcüstanda yaşayan azərbaycanlılar üçün problemlər yaradır. Oxşar çətinliklər Rusiya ilə sərhədlərdə də müşahidə olunur. Türkiyə və İranla bağlı da müəyyən narazılıqlar var. Lakin bütün bunlara baxmayaraq, əsas prioritet dövlətin və millətin təhlükəsizliyidir”.

Deputat vurğulayıb ki, quru sərhədlərin qapalı qalması dövlət əhəmiyyətli qərarlardan irəli gəlir:
“Təhlükəsizlik faktoru hər zaman birinci planda olmalıdır. Şərait imkan verdiyi anda dövlət tərəfindən müvafiq qərar qəbul ediləcək və quru sərhədlərin açılması təmin olunacaq. Hazırkı mərhələdə isə bu addım məqsədəuyğun hesab edilmir”.

Qeyd edək ki, Nazirlər Kabinetinin qərarına əsasən, ölkə ərazisində xüsusi karantin rejiminin müddəti 2026-cı il aprelin 1-i saat 06:00-dək uzadılıb.