Erməni iqtisadçı Qaqik Makaryan hesab edir ki, Ermənistan Azərbaycana bazarın ehtiyacına uyğun məhsullar tədarük edə bilər. O, yerli KİV-ə müsahibəsində qeyd edib ki, xüsusilə tikinti materialları sahəsində ixrac imkanı böyükdür.

Ekspert bildirib ki, Ermənistanda tikinti materiallarının istehsalı üçün Avropa texnologiyalarından geniş istifadə olunur:
“Qatarla daşımalar problemi olmasa, tikinti materiallarının böyük həcmdə ixracı mümkündür. Bundan başqa, Azərbaycan bazarı Ermənistan şərabları, meyvə araqları və müəyyən növ konservləşdirilmiş məhsullarla maraqlana bilər. Çay mədəniyyətini nəzərə alsaq, mürəbbə satışına da ümid var. Eyni zamanda, tikiş məhsulları, bəzi dərmanlar, elektrik və elektron avadanlıqlar da ixrac potensialına malikdir. Gələcəkdə münasibətlər inkişaf edərsə, şirniyyat və siqaret kimi məhsullar da satışa çıxarıla bilər.
Ermənistanın bəzi fabrikləri yüksək keyfiyyətli şokolad istehsal edir, bunlar artıq Avropaya da ixrac olunur. Həmçinin logistika avadanlıqları və elektrik naqilləri potensial məhsullar sırasındadır”.
Makaryan vurğulayıb ki, Azərbaycan Ermənistan üçün geniş bazar ola bilər: “Əgər daimi ticarət bazarı formalaşarsa, ixrac həcmində artım mümkündür. Azərbaycan əhalisinin sayı 10-11 milyon nəfərdir, bu, Ermənistan bazarından ən azı üç dəfə böyükdür”.

Ermənistanın iqtisadiyyat naziri Gevorq Papoyan da sərhədin açılmasının vaxtının çatdığını bildirib:
“Ermənistan və Azərbaycan arasında quru sərhədinin açılması, həmçinin dəmir yolu ilə daşınan yüklərin multimodal şəkildə yük maşınlarına keçirilməsi üçün əlverişli vaxtdır”.
Papoyan həmçinin Azərbaycana ixrac edilə biləcək məhsulları sadalayıb: “Kənd təsərrüfatı məhsulları, alüminium folqa, qızıl zinət əşyaları, ferromolibden və balıq məhsulları”.

Xatırladaq ki, Azərbaycan dekabrın 19-da Ermənistana 1300 ton həcmində Aİ95 markalı benzin göndərib. Ermənistanın ölkəmizə məhsul tədarükü məsələsi də bu kontekstdə gündəmə gətirilir.