Prezident İlham Əliyev 2026-cı il üçün dövlət büdcəsi haqqında qanunu təsdiqləyib.
Qanuna əsasən, 2026-cı ildə dövlət büdcəsinin gəlirlərinin 38 milyard 609 milyon manat olacağı proqnozlaşdırılır. Bu göstərici 2025-ci ilin təsdiq olunmuş proqnozu ilə müqayisədə 0,7 faiz çoxdur. Büdcə xərclərinin isə 41 milyard 703,6 milyon manat təşkil edəcəyi gözlənilir ki, bu da əvvəlki ilə nisbətən 0,7 faiz artım deməkdir.
Nəticədə 2026-cı il üzrə dövlət büdcəsində 3 milyard 94,6 milyon manat kəsir yaranacağı proqnozlaşdırılır. Bu, illik müqayisədə 1,4 faiz çoxdur.
Bundan əlavə, 2026-cı ildə Azərbaycanın icmal büdcəsinin gəlirlərinin 44 milyard 969,4 milyon manat, xərclərinin isə 48 milyard 839,3 milyon manat olacağı gözlənilir. Bu göstəricilər 2025-ci ilin təsdiqlənmiş proqnozları ilə müqayisədə müvafiq olaraq 2,3 faiz və 2,5 faiz artım deməkdir.
İcmal büdcədə yaranacaq kəsirin isə 3 milyard 869,3 milyon manat olacağı proqnozlaşdırılır ki, bu da illik müqayisədə 5,2 faiz çoxdur.
Qeyd edək ki, 2026-cı il dövlət büdcəsinin hesablamalarında neftin bir barelinin qiyməti 65 ABŞ dolları səviyyəsində götürülüb.