Dövlət Sosial Müdafiə Fondunun (DSMF) son illər üzrə maliyyə göstəriciləri açıqlanıb. Statistik məlumatlara əsasən, 2018–2026-cı illər ərzində fondun həm gəlirlərində, həm də xərclərində davamlı və əhəmiyyətli artım müşahidə olunur.
Qanuntv.az xəbər verir ki, 2018-ci ildə DSMF-nin gəlir və xərcləri təxminən 3,7 milyard manat təşkil etdiyi halda, növbəti illərdə sosial sığorta daxilolmalarının artması, əməkhaqlarının yüksəlməsi və sosial ödənişlərin genişlənməsi fonunda bu göstəricilər mərhələli şəkildə yüksəlib.
Məlumatlara görə, 2024-cü ildə fondun gəlirləri 7 milyard manatı ötüb, xərclər isə 6,8 milyard manata yaxınlaşıb. Xərclərin əsas hissəsi pensiya ödənişləri, sosial müavinətlər və digər sosial təminat tədbirlərinə yönəldilib.
2026-cı il üçün proqnozlara əsasən, DSMF-nin gəlirlərinin 8,3 milyard manat, xərclərinin isə 8,4 milyard manata yaxın olacağı gözlənilir. Gəlirlərin böyük hissəsini məcburi dövlət sosial sığorta haqları təşkil edəcək. Xərclərin isə təxminən 95 faizdən çoxu əhaliyə birbaşa sosial ödənişlərə sərf olunacaq.
Rəsmi statistikaya əsasən, 2018–2026-cı illər ərzində DSMF-nin maliyyə dövriyyəsi təxminən iki dəfədən çox artıb. Bu artım ölkədə sosial müdafiə sisteminin gücləndirilməsi, pensiya təminatının yaxşılaşdırılması və sosial ödənişlərin əhatə dairəsinin genişləndirilməsi ilə əlaqələndirilir.
Qeyd edək ki, Dövlət Sosial Müdafiə Fondu əhalinin sosial rifahının qorunması istiqamətində əsas maliyyə institutlarından biri olaraq fəaliyyətini davam etdirir.
