Tehran sanksiyaların ləğvi müqabilində öz nüvə proqramının hər zaman dinc məqsədlərə xidmət edəcəyinə zəmanət verməyə hazırdır.
QanunTV.az “Report”-a istinadən xəbər verir ki, bunu İranın xarici işlər naziri Abbas Əraqçi ABŞ-ın “Fox News” telekanalına müsahibəsində bildirib.
XİN rəhbəri İranın danışıqlar masasına qayıtmaq üçün mümkün güzəştləri barədə aparıcının sualını cavablandırarkən qeyd edib ki, Tehran nüvə proqramının dinc xarakterini təmin etməyə hazırdır:
“Biz nüvə proqramımızın dinc xarakterinə zəmanət verə bilərik, onun həmişə dinc qalacağını təmin edə bilərik. Əvəzində isə sanksiyaların ləğv olunmasını gözləyirik”, – deyə Abbas Əraqçi vurğulayıb.
Nazir eyni zamanda bildirib ki, İran öz raket proqramı ilə bağlı hər hansı müzakirələr aparmağa hazır deyil. Onun sözlərinə görə, ballistik raketlər ölkənin milli təhlükəsizliyinin və müdafiə qabiliyyətinin əsas elementlərindən biridir:
“Ballistik raketlər bizim müdafiəmiz və ən etibarlı qorunma vasitəmizdir. Təhlükəsizliyimiz və müdafiəmiz üçün bizə lazım olduğu halda, nə üçün bu məsələni müzakirə etməliyik?” – deyə Əraqçi qeyd edib.