“Qarabağ” futbol klubunun baş məşqçisi Qurban Qurbanov və komandanın üzvləri Azərbaycan Qida Təhlükəsizliyi İnstitutunda (AQTİ) olublar.
Qanuntv.az xəbər verir ki, Azərbaycan Respublikasının Qida Təhlükəsizliyi Agentliyinin (AQTA) Aparat rəhbəri Məmmədrəhim Nəcəfov qonaqlara ölkəmizdə qida təhlükəsizliyinin təmin olunması istiqamətində həyata keçirilən tədbirlər barədə ətraflı məlumat verib. Bildirilib ki, qida təhlükəsizliyi mədəniyyətinin formalaşdırılması və sağlam qidalanmanın təşviqi Agentliyin əsas prioritet istiqamətlərindəndir.
AQTİ-nin İdarə Heyətinin sədri Əli Nəbiyev isə qeyd edib ki, Azərbaycanda sağlam həyat tərzinin təbliği məqsədilə genişmiqyaslı maarifləndirmə kampaniyaları həyata keçirilir. Onun sözlərinə görə, bu təşəbbüslərdə “Qarabağ” futbol klubunun üzvləri də fəal iştirak edərək dəstək göstərirlər.
Qurban Qurbanov öz növbəsində vurğulayıb ki, idmanda uğurun əsas şərtlərindən biri, xüsusilə futbolçular üçün, sağlam və balanslı qidalanmadır. Baş məşqçi bildirib ki, rəhbərlik etdiyi komanda bu məsələyə hər zaman xüsusi diqqət və məsuliyyətlə yanaşır. O əlavə edib ki, futbolçuların qidalanmasına nəzarət edən həkim-diyetoloq AQTİ-nin mütəxəssisidir və bu peşəkar dəstək idmançıların sağlamlığının qorunmasına, fiziki hazırlıq səviyyəsinin artırılmasına və meydanda yüksək nəticələrin əldə olunmasına mühüm töhfə verir.
Görüş çərçivəsində gələcəkdə birgə həyata keçirilməsi planlaşdırılan layihələr müzakirə edilib, qarşıdakı oyunlara hazırlıq prosesi və futbolçuların qidalanma məsələləri ətrafında fikir mübadiləsi aparılıb. “Qarabağ” klubuna növbəti oyunlarda uğurlar arzulanıb.
Sonda Qurban Qurbanov və komanda üzvləri İnstitutun Analitik Ekspertiza Mərkəzinin laboratoriyaları ilə tanış olub, burada aparılan müayinə və tədqiqat prosesləri barədə məlumat əldə ediblər.
