Bakının Səbail rayonunda məktəbdə şagirdlər arasında baş verən mübahisə qanlı hadisə ilə nəticələnib.
Qanuntv.az xəbər verir ki, hadisə paytaxtdakı 203 nömrəli tam orta məktəbdə qeydə alınıb.
Məlumata görə, həmin məktəbdə təhsil alan iki 9-cu sinif şagirdi arasında təhsil ocağının yeməkxanasında mübahisə yaranıb. Mübahisə zamanı şagirdlərdən biri digər həmyaşıdına bıçaqla xəsarət yetirib.
Yaralanan şagird dərhal xəstəxanaya çatdırılıb.
Valideynlərdən birinin sözlərinə görə, hadisə məktəbdə tənəffüs zamanı baş verib.
“Uşaqlar ayrı-ayrı siniflərin şagirdləri idi. Sözləri çəp gəlib, aralarında mübahisə yaranıb. Hadisə övladımın gözünün qabağında baş verib, uşaq çox qorxub”, – deyə valideyn bildirib.
Məsələ ilə bağlı Bakı Şəhəri üzrə Təhsil İdarəsindən bildirilib ki, martın 13-də saat 10:00 radələrində Bakı şəhəri 203 nömrəli tam orta məktəbdə tənəffüs zamanı doqquzuncu sinif şagirdlərindən biri digərinə xəsarət yetirib. Xəsarət alan şagirdə dərhal tibbi yardım göstərilib, təcili tibbi yardıma və valideynlərə məlumat verilib.
Fakt aidiyyəti qurumlar tərəfindən nəzarətə götürülüb və hadisə ilə bağlı araşdırmalara başlanılıb.
TƏBİB-dən verilən məlumata görə isə, saat 10:30-da Ziya Yusifzadə küçəsindən Respublika Təcili və Təxirəsalınmaz Tibbi Yardım Mərkəzinə çağırış daxil olub. Hadisə yerinə təcili tibbi yardım briqadası cəlb edilib və bir nəfər Kliniki Tibbi Mərkəzə hospitalizasiya olunub.
Pasiyentə sol bud nahiyəsinin kəsilmiş-deşilmiş yarası diaqnozu qoyulub, ona zəruri tibbi xidmətlər göstərilib. Vəziyyəti qənaətbəxş qiymətləndirildiyindən ambulator müalicə üçün evə buraxılıb.
