Martın 17-də İçərişəhər ərazisində yerləşən XV əsrə aid ölkə əhəmiyyətli tarixi abidə – Buxara karvansarasının əsaslı bərpa və konservasiya işlərindən sonra təntənəli açılışı keçirilib. Eyni zamanda burada fəaliyyət göstərəcək “BuxarArt” sənət məkanının təqdimatı olub.
Tədbirdə Anar Ələkbərov, Səadət Yusifova, Rüfət Mahmud, eləcə də mədəniyyət xadimləri və ictimaiyyət nümayəndələri iştirak ediblər.
Qədim ticarət yolları üzərində inşa edilən və Mərkəzi Asiyadan gələn tacirlərin dayanacağı kimi istifadə olunan bu tarixi tikili İlham Əliyev tərəfindən imzalanmış sərəncama uyğun həyata keçirilən genişmiqyaslı layihə çərçivəsində bərpa olunaraq əvvəlki görkəminə qaytarılıb. Bərpa zamanı abidənin memarlıq və mühəndislik xüsusiyyətlərinin qorunması əsas prinsip kimi götürülüb.
Çıxış edən Rüfət Mahmud bildirib ki, həyata keçirilən işlər tarixi irsin qorunması və gələcək nəsillərə ötürülməsi baxımından xüsusi əhəmiyyət daşıyır. Onun sözlərinə görə, “BuxarArt” sənət məkanı İçərişəhərin mədəni həyatına yeni nəfəs gətirəcək.
Layihənin bərpaçısı Erich Pumer qeyd edib ki, təmir və möhkəmləndirmə işləri böyük həssaslıqla aparılıb və abidənin orijinal memarlıq üslubu qorunub saxlanılıb. Eyni zamanda, tikilinin uzunömürlülüyü üçün müasir mühəndislik həllərindən istifadə olunub.
Bahrom Aşrafxanov isə çıxışında vurğulayıb ki, bu karvansara tarixən müxtəlif xalqların görüş və ticarət mərkəzi olub. Onun sözlərinə görə, bu məkan Böyük İpək Yolu üzərində yerləşərək Azərbaycan ilə Mərkəzi Asiya arasında əlaqələrin inkişafında mühüm rol oynayıb.
Bərpa və konservasiya işləri İçərişəhər Dövlət Tarix-Memarlıq Qoruğu İdarəsi tərəfindən sifariş olunub və Avstriyanın Atelier Erich Pummer GmbH şirkəti tərəfindən 3,5 il ərzində həyata keçirilib. İşlər zamanı abidənin orijinallığının qorunması üçün autentik materiallardan və ənənəvi hörgü üsullarından istifadə edilib, eyni zamanda müasir texnologiyalar tətbiq olunub.
Yeni konsepsiyaya əsasən, karvansara yerli sənətkarlar üçün yaradıcı məkana çevrilib. Burada yerləşən 18 otaq müxtəlif sənət sahələrini təmsil edən ustaların istifadəsinə verilib. Sənətkarlar burada həm öz əl işlərini hazırlayacaq, həm də ziyarətçilərə təqdim edib satışını həyata keçirəcəklər.
“BuxarArt” həmçinin interaktiv sənət məkanı kimi fəaliyyət göstərəcək. Burada qonaqlar üçün ustad dərsləri təşkil olunacaq, toxuculuq, xalçaçılıq, keramika, miniatür sənəti, ebru, taxtaoyma və digər ənənəvi sənət növləri canlı şəkildə nümayiş etdiriləcək.
Buxara karvansarasının yenidən fəaliyyətə başlaması milli sənətkarlıq ənənələrinin qorunması, yaradıcı imkanların genişləndirilməsi və Azərbaycanın zəngin mədəni irsinin daha geniş auditoriyaya təqdim olunması baxımından mühüm əhəmiyyət daşıyır. “BuxarArt”ın özünəməxsus memarlıq üslubu və atmosferi ilə paytaxtın ən cəlbedici mədəniyyət məkanlarından birinə çevriləcəyi gözlənilir.
