Qəbələ şəhərində “Sülh Körpüsü” təşəbbüsü çərçivəsində Azərbaycan və Ermənistan vətəndaş cəmiyyətlərinin nümayəndələrinin iştirakı ilə ikitərəfli dəyirmi masa keçirilib. Tədbir çərçivəsində Azərbaycan Prezidentinin köməkçisi Hikmət Hacıyev ilə görüş baş tutub.

Görüş zamanı Hacıyev iştirakçılarla fikir mübadiləsi aparıb, o cümlədən erməni nümayəndə heyətinin suallarını cavablandırıb. O, Azərbaycanın sülh gündəliyinə sadiqliyini vurğulayaraq, Vaşinqtonda əldə olunmuş razılaşmaların və sammitin ruhuna bağlılığın davam etdiyini bildirib.

Eyni zamanda, iki ölkə arasında gələcəkdə ticarət münasibətlərinin qurulması, Azərbaycanın ərazisindən Ermənistana məhsulların tranzit keçidi imkanları müzakirə olunub. TRIPP layihəsinin reallaşdırılmasının regionda nəqliyyat infrastrukturuna və ümumi əməkdaşlıq mühitinə müsbət təsir göstərəcəyi qeyd edilib.

Hacıyev vurğulayıb ki, Azərbaycan və Ermənistan arasında sülh danışıqları ikitərəfli xarakter daşıdığı kimi, vətəndaş cəmiyyətləri arasında etimad quruculuğu tədbirlərinin də məhz bu formatda davam etdirilməsi vacibdir.

Sonda qeyd olunub ki, dünyada baş verən gərgin proseslər fonunda Cənubi Qafqazda sülh və təhlükəsizliyin təmin edilməsi xüsusi əhəmiyyət daşıyır.