Bakının Xətai rayonunda yerləşən 257 nömrəli tam orta məktəbdə bir neçə şagirddə allergik reaksiya müşahidə olunub.

Qanuntv.az xəbər verir ki, hadisə mayın 1-də məktəbin V sinif şagirdləri arasında baş verib. Məktəb rəhbərliyinin məlumatına görə, şagirdlərdən biri tərəfindən gətirilən nəm salfetdən istifadə edildikdən sonra bir neçə uşağın əlində allergik əlamətlər yaranıb.



Bildirilib ki, məktəb rəhbərliyi tərəfindən dərhal təcili tibbi yardıma məlumat verilib. Həkim briqadası hadisə yerinə gələrək şagirdləri müayinə edib və onlara yerində ilkin tibbi yardım göstərib.

TƏBİB-dən verilən məlumata əsasən, saat 15:00 radələrində Respublika Təcili və Təxirəsalınmaz Tibbi Yardım Mərkəzinə məktəbdən çağırış daxil olub. Təcili tibbi yardım briqadası tərəfindən ümumilikdə 7 nəfərə yardım göstərilib.

Məktəb rəhbərliyi qeyd edib ki, aidiyyəti dövlət qurumları və valideynlər məlumatlandırılıb, hazırda şagirdlərin sağlamlıq vəziyyəti normaldır.

Hadisə ilə bağlı polisə də məlumat daxil olub. Daxili İşlər Nazirliyinin mətbuat xidmətindən bildirilib ki, Xətai Rayon Polis İdarəsində təhqiqat araşdırması başlanıb.

Qeyd olunub ki, allergik reaksiyaya səbəb olduğu ehtimal edilən nəm salfet ekspertizaya təqdim olunmaq üçün götürülüb.
Araşdırmalar davam etdirilir.