Mayın 3-də tədrisi Azərbaycan dilindən fərqli dillərdə aparılan ümumi təhsil müəssisələrinin 9-cu və 11-ci sinif şagirdləri üçün buraxılış imtahanı çərçivəsində Azərbaycan dili (dövlət dili) imtahanı keçirilib. Eyni zamanda ali və orta ixtisas təhsili müəssisələrinə qəbul imtahanını Azərbaycan dilindən fərqli dildə verən əvvəlki illərin məzunları da imtahan veriblər.
Qanuntv.az xəbər verir ki, Dövlət İmtahan Mərkəzinin (DİM) məlumatına görə, imtahan ümumilikdə 21 şəhər və rayonda yerləşən 129 binada təşkil olunub və 29 min 182 nəfərin iştirakı nəzərdə tutulub.
İmtahanda 55 nəfər sağlamlıq imkanları məhdud şagird də iştirak edib. Onların rahat şəkildə imtahan verməsi üçün xüsusi zallar ayrılıb, gözdən əlilliyi olan şəxslərə fərdi nəzarətçilər təyin edilib, hərəkət məhdudiyyətli şagirdlər üçün isə xüsusi şərait yaradılıb.
İmtahanın idarə olunması üçün 129 ümumi imtahan rəhbəri, 339 imtahan rəhbəri, 2709 nəzarətçi, 399 mühafizə əməkdaşı və 129 bina nümayəndəsi ayrılıb.
İlkin məlumata əsasən, imtahan binasının girişində yoxlama zamanı bir nəfərin ayaqqabısının altında gizlədilmiş mobil telefon aşkarlanıb. Faktla bağlı akt tərtib olunub və araşdırma aparılacaq.
Cari ilin məzunları bu imtahanda maksimum 100 bal toplaya bilərlər və nəticə yekun attestasiya sənədinə yazılacaq. Qəbul üçün isə abituriyentlərin ən azı 50 bal toplaması tələb olunur.
Əvvəlki illərin məzunları üçün maksimal bal 30-dur və “məqbul” qiymət almaq üçün minimum 15 bal toplamaq lazımdır.
DİM bildirib ki, sabahdan etibarən imtahan materiallarının emalına başlanacaq və nəticələrin iki həftə ərzində elan olunması nəzərdə tutulur. Qapalı tipli test tapşırıqlarının düzgün cavabları isə sabah DİM-in rəsmi saytında yerləşdiriləcək.
