Qarabağ FK klubunun baş məşqçisi Qurban Qurbanov komandanın gələcək planları və əsas heyətdə gözlənilən dəyişikliklərlə bağlı danışıb.

Qanuntv.az xəbər verir ki, təcrübəli mütəxəssis bu barədə “İmişli” ilə keçirilən oyundan sonra təşkil olunan mətbuat konfransında açıqlama verib.

Baş məşqçi bildirib ki, mövsümün sonunda heyətdə dəyişikliklər qaçılmaz olacaq. O, bəzi futbolçuların komandadan ayrılacağını təsdiqləsə də, hazırda konkret ad açıqlamağın düzgün olmadığını vurğulayıb.

Qurban Qurbanovun sözlərinə görə, komandadan ayrılacaq oyunçuların siyahısı artıq müəyyənləşdirilib:
“Əsas heyətdən gedəcək futbolçular var, amma indidən konkret ad açıqlamaq düzgün çıxmaz. Həmin oyunçuların siyahısı özümdə var. Vaxtı gələndə klubun rəsmi saytında hər biri növbə ilə ictimaiyyətə açıqlanacaq”.

Qeyd edək ki, “Qarabağ” mövsümün sonuna yaxın həm daxili çempionatda, həm də gələcək avrokubok planlamasında heyətin formalaşdırılması istiqamətində işlərini davam etdirir.