Qurbanqulu Berdiməhəmmədov Prezident İlham Əliyevi təbrik edib
Türkmən xalqının Milli Lideri, Türkmənistan Xalq Məsləhətinin sədri Qurbanqulu Berdiməhəmmədov Azərbaycan Respublikasının Prezidenti İlham Əliyevə doğum günü münasibətilə təbrik məktubu ünvanlayıb.
Qanuntv.az xəbər verir ki, təbrikdə Prezident İlham Əliyevin rəhbərliyi ilə Azərbaycanın sosial-iqtisadi inkişafda mühüm uğurlar qazandığı, əhalinin həyat səviyyəsinin ardıcıl şəkildə yüksəldiyi xüsusi vurğulanıb.
Qurbanqulu Berdiməhəmmədov Türk Dövlətləri Təşkilatının Sammiti çərçivəsində Azərbaycana səfərini və Qəbələ şəhərində Prezident İlham Əliyevlə keçirilən görüşü məmnunluqla xatırladığını bildirib.
O, Türkmənistan–Azərbaycan əməkdaşlığının bundan sonra da qardaş xalqların maraqları naminə inkişaf edəcəyinə əminliyini ifadə edib, ikitərəfli münasibətlərin möhkəmləndirilməsində Prezident İlham Əliyevin şəxsi töhfəsini yüksək qiymətləndirib.
Məktubun sonunda Qurbanqulu Berdiməhəmmədov Prezident İlham Əliyevə möhkəm cansağlığı, xoşbəxtlik və fəaliyyətində uğurlar, Azərbaycan xalqına isə sülh, tərəqqi və davamlı rifah arzulayıb.
