İqtisadçı Asif İbrahimov hesab edir ki, Türkiyə və bir sıra Avropa ölkələrində olduğu kimi, Azərbaycanda da bələdiyyələrin idarəetmədə daha aktiv rol oynaması mümkündür. O, Konkret.az-a açıqlamasında bildirib ki, hazırkı sistemdə icra hakimiyyətləri, icra nümayəndəlikləri və bələdiyyələr paralel fəaliyyət göstərir ki, bu da idarəetmədə səmərəsizlik yaradır.
Asif İbrahimovun sözlərinə görə, Azərbaycanda əsas problemlərdən biri üfüqi və şaquli məsuliyyətin düzgün bölüşdürülməməsidir. Oxşar funksiyaları yerinə yetirən qurumların çoxluğu həm büdcə yükünü artırır, həm də korrupsiya risklərini yüksəldir:
“Bir-birini təkrarlayan qurumların bir hissəsi ləğv edilməli, bir hissəsi isə birləşdirilməlidir. Bu addım həm dövlət xərclərini azaldar, həm də korrupsiya mənbələrinin aradan qaldırılmasına xidmət edər”.
İqtisadçı qeyd edib ki, Azərbaycanda bələdiyyə institutu faktiki olaraq formal xarakter daşıyır: “Bələdiyyələr hazırda əsasən zibil pulu və torpaq vergisi yığımı ilə məşğuldur. Halbuki əvvəllər onların özünü maliyyələşdirmə imkanları var idi – torpaq satışı, yerli resurslardan gəlirlər, otel rüsumları və reklam lövhələrindən daxilolmalar. Sonradan qanunvericilikdə edilən dəyişikliklər bu səlahiyyətləri məhdudlaşdırdı”.
Ekspert vurğulayıb ki, Almaniya, Fransa, İngiltərə və Türkiyə modelində yerli özünüidarəetmə orqanları real səlahiyyətlərə malikdir və Azərbaycanda da bu təcrübə tətbiq oluna bilər:
“Rayon icra hakimiyyətləri artıq köhnəlmiş modeldir. Onların əsas funksiyaları tədbirlərin təşkili və seçkilər zamanı səfərbərlikdir. Yerli idarəetmə ilə bağlı öhdəliklər bələdiyyələrə verilə bilər. Bu, idarəetməni sadələşdirər və çevik sistem yaradar”.
Asif İbrahimov hesab edir ki, bələdiyyələrin gücləndirilməsi və icra hakimiyyətlərinin səlahiyyətlərinin azaldılması Azərbaycanda idarəetmədə boşluqların aradan qaldırılması üçün əsas addımlardan biridir.