Afrika Millətlər Kubokunda Mali millisinin uğursuzluğu ölkədə qalmaqallı hadisə ilə nəticələnib. Mali yığmasının turnirin dörddəbir final mərhələsində Seneqal millisinə uduzaraq mübarizəni dayandırmasından sonra Sinayogo adlı şəxs azarkeşlərin hücumuna məruz qalıb.
Məlumata görə, Sinayogo özünü dini ayinlər və “xüsusi güclər” vasitəsilə futbol nəticələrinə təsir edə bilən şəxs kimi təqdim edərək, Mali millisinin Afrika Millətlər Kubokunun qalibi olacağına zəmanət verib. O, bu vədlə azarkeşlərdən təxminən 24 milyon CFA frankı (təqribən 39 min ABŞ dolları) vəsait toplayıb.
Lakin komandanın Seneqala məğlub olması azarkeşlərin narazılığına səbəb olub. Qəzəblənən şəxslər Sinayogonun yaşadığı ünvana toplaşaraq ondan pulların geri qaytarılmasını tələb ediblər. Gərginlik artdıqdan sonra polis hadisəyə müdaxilə edib.
Mali hüquq-mühafizə orqanları Sinayogonu fırıldaqçılıq və vətəndaşları aldatma şübhəsi ilə saxlayıb. Hazırda faktla bağlı araşdırma aparılır. Rəsmi qurumlar əhaliyə qeyri-rəsmi mərc, “zəmanətli nəticə” və bu tip vədlərə inanmaqdan çəkinməyi tövsiyə edib.
Qeyd edək ki, Afrika ölkələrində futbol turnirləri zamanı oxşar hallar son illər tez-tez müşahidə olunur və hüquq-mühafizə orqanları bu cür fəaliyyətlərə qarşı nəzarəti gücləndirir.