İspaniyada ağır dəmir yolu qəzası baş verib. İlkin məlumatlara görə, iki yüksək sürətli qatarın toqquşması nəticəsində azı 21 nəfər həyatını itirib, təxminən 100 sərnişin isə müxtəlif dərəcəli xəsarətlər alıb.
Məlumata əsasən, Malaqa–Madrid marşrutu üzrə hərəkət edən və 317 sərnişin daşıyan yüksək sürətli qatar naməlum səbəbdən relsdən çıxaraq qonşu dəmir yolu xəttinə keçib. Həmin vaxt Madrid–Uelva istiqamətində hərəkətdə olan digər yüksək sürətli qatar bu xətt üzrə hərəkət etdiyindən iki qatar arasında güclü toqquşma baş verib.
Hadisə yerinə çoxsaylı təcili tibbi yardım, xilasetmə və polis qüvvələri cəlb olunub. Yaralılar yaxınlıqdakı xəstəxanalara yerləşdirilib, bəzilərinin vəziyyətinin ağır olduğu bildirilir. Qəza baş verən ərazidə dəmir yolu hərəkəti müvəqqəti olaraq dayandırılıb.
Hazırda hadisənin səbəbləri araşdırılır. Rəsmi qurumlar qəza ilə bağlı genişmiqyaslı istintaqın başladıldığını açıqlayıb.