2025-ci ilin yanvar-noyabr ayları ərzində Azərbaycanda xarici turistlərin konvertasiya olunan valyutada xərcləri 3 milyard manatdan, yerli turistlərin xərcləri isə yanvar-sentyabr ayları üzrə 4,5 milyard manatdan artıq olub. İlin yekun göstəriciləri hələ açıqlanmasa da, ilkin qiymətləndirmələrə əsasən, turist xərclərinin ümumi həcminin 9 milyard manatı ötəcəyi proqnozlaşdırılır.
Bu barədə Dövlət Turizm Agentliyinin sədr müşaviri Kənan Quluzadə “Report”-a məlumat verib. Onun sözlərinə görə, yaxın illərdə bu göstəricilərin davamlı artımı gözlənilir ki, bu da həm ölkə rəhbərliyi tərəfindən müəyyən edilmiş strateji tapşırıqlara, həm də “2026-2030-cu illər üzrə Turizmin İnkişafı Dövlət Proqramı”nın layihəsinə tam uyğundur.
“K. Quluzadə qeyd edib ki, dövlət başçısı turizm sahəsinin həm kəmiyyət, həm də keyfiyyət baxımından inkişaf etdirilməsinin zəruriliyini vurğulayıb. Bu istiqamətdə kompleks tədbirlər həyata keçirilir və turizm sahəsinin daha da genişləndirilməsi nəzərdə tutulub. Azərbaycan turizmi hazırda yeni inkişaf mərhələsinə qədəm qoyur”.
Postpandemiya dövründə bərpa prosesləri, geosiyasi sabitliksizlik, qloballaşma və informasiya əlçatanlığının genişlənməsi fonunda dünya turizm bazarında hər bir turist üçün rəqabət getdikcə kəskinləşir. Bu şəraitdə Azərbaycan formalaşmaqda olan turizm istiqaməti kimi qlobal bazarda mövqeyini daha fəal şəkildə gücləndirməli və təqdim etməlidir.
K. Quluzadə bildirib ki, beynəlxalq təcrübələr göstərir ki, qlobal bazarda həyata keçirilən marketinq kampaniyaları nəticəsində ölkələr daha çox ziyarətçi cəlb edir. Azərbaycanda turizmin inkişafına ayrılan xərclər baxımından ölkə dünya ölkələri arasında orta mövqelərdə qərarlaşıb. 119 dövlət arasında Azərbaycan 65-ci yeri tutur.
Dünya İqtisadi Forumunun 2024-cü il üzrə Səyahət və Turizm İnkişafı İndeksinə görə, “dövlətin səyahət və turizmin inkişafına ayırdığı xərclər” göstəricisi Azərbaycanda 2,92 bal ilə qiymətləndirilmiş, dünya üzrə orta göstərici isə 3,5 bal təşkil edir. Regiondakı qonşu ölkələrdən Gürcüstan 3,07 bal (56-cı yer), Ermənistan isə 3,31 bal (51-ci yer) ilə qiymətləndirilmişdir.
K. Quluzadə gəlir artımını təmin etmək üçün daha çox investisiyaların tələb olunduğunu bildirib: “2018-2024-cü illərdə Azərbaycan Turizm Bürosu hər yeni turistin cəlb edilməsi üçün 16,7 manat xərcləyib, dövlətin vergi gəlirləri isə 94,7 manat təşkil etmişdir. Turizmin inkişafına dövlət səviyyəsində investisiya etmək həm sərfəlidir, həm də zəruridir. Turizm yalnız rəqəmlərdən ibarət deyil, həm də mədəniyyətimizi və tariximizi geniş auditoriyaya tanıtmaq baxımından ən vacib sahələrdən biridir”.
Sədr müşaviri həmçinin bildirib ki, turizmdən əldə olunan milyardlarla gəlirin fonunda bəzi media platformalarının xarici jurnalistlərin, bloger və turizm sənayesinin nümayəndələrinin Azərbaycana cəlb olunmasına ayrılan xərclərə “təəccüblənməsi” səriştəsizliyin göstəricisidir.
“Turizm sahəsində rəqəmsal marketinq turistlərin cəlb edilməsinin əsas vasitələrindən biridir.
Dünyada səyahətçilərin üçdə birindən çoxu səyahət ideyalarının axtarışı üçün sosial şəbəkələrə müraciət edir. Bu istiqamətdə xərclər baxımından qonşularımızdan da geridəyik. Yaxın gələcəkdə rəqabət qabiliyyətimizi artırmaq üçün onlara çatmalı, hətta onları ötüb keçməliyik”, - deyə K. Quluzadə əlavə edib.
