Aprelin 6-da Tbilisi şəhərində Azərbaycan Respublikasının Prezidenti İlham Əliyev və Gürcüstanın Baş naziri İrakli Kobaxidze mətbuata bəyanatlarla çıxış ediblər.
Qanuntv.az xəbər verir ki, əvvəlcə Gürcüstanın Baş naziri İrakli Kobaxidze çıxış edib.
Baş nazir çıxışında Azərbaycan Prezidentini səmimi salamlayaraq onun Gürcüstana səfərinin xüsusi əhəmiyyət daşıdığını bildirib. O qeyd edib ki, iki ölkə arasında münasibətlər əsrlərə söykənən dostluq və qonşuluq prinsipləri üzərində qurulub və bu gün strateji tərəfdaşlıq səviyyəsində inkişaf edir.
İrakli Kobaxidze Azərbaycanın Gürcüstanın suverenliyi və ərazi bütövlüyünə verdiyi dəstəyə görə təşəkkür edib və vurğulayıb ki, Gürcüstan da hər zaman Azərbaycanın milli maraqlarını dəstəkləyir. O, həmçinin regionda sülh və əməkdaşlığın vacibliyini qeyd edərək, Azərbaycan ilə Ermənistan arasında aparılan sülh prosesini alqışladıqlarını bildirib.
Baş nazir çıxışında Cənubi Qafqaz regionunun artan strateji əhəmiyyətinə diqqət çəkərək Orta Dəhlizin, eləcə də nəqliyyat və enerji layihələrinin əhəmiyyətini vurğulayıb. Onun sözlərinə görə, Gürcüstan və Azərbaycan beynəlxalq layihələrdə etibarlı tərəfdaş kimi çıxış edir.
Daha sonra Azərbaycan Prezidenti İlham Əliyev bəyanatla çıxış edib.
Prezident İlham Əliyev Gürcüstana səfərindən məmnunluğunu ifadə edərək, iki ölkə arasında münasibətlərin yüksək səviyyədə olduğunu bildirib. O qeyd edib ki, Azərbaycan və Gürcüstan arasında dostluq və qardaşlıq əlaqələri uzun tarixə malikdir və bu ənənələr bu gün də uğurla davam etdirilir.
Dövlət başçısı Gürcüstanda mövcud olan siyasi sabitliyi və iqtisadi inkişafı yüksək qiymətləndirərək, bunun ölkəyə xarici investisiyaların cəlb olunmasında mühüm rol oynadığını vurğulayıb. Bildirib ki, Azərbaycan investorları da Gürcüstan iqtisadiyyatına böyük maraq göstərir və bu günə qədər bu ölkəyə milyardlarla dollar sərmayə yatırılıb.
Prezident İlham Əliyev qeyd edib ki, iki ölkə beynəlxalq təşkilatlarda da daim bir-birini dəstəkləyir və qarşılıqlı şəkildə suverenlik və ərazi bütövlüyü prinsiplərinə sadiqdir.
O, həmçinin enerji və nəqliyyat sahəsində həyata keçirilən iri layihələrə toxunaraq bildirib ki, Cənub Qaz Dəhlizi və Bakı-Tbilisi-Ceyhan neft kəməri regionun enerji təhlükəsizliyində mühüm rol oynayır. Prezident əlavə edib ki, Azərbaycan qazı hazırda 16 ölkəyə ixrac olunur və bu marşrutların başlanğıcı məhz Gürcüstandan keçir.
Dövlət başçısı çıxışında Orta Dəhliz layihəsinin əhəmiyyətini də vurğulayaraq bildirib ki, bu nəqliyyat xətti Azərbaycan və Gürcüstan üçün əsas strateji istiqamətlərdən biridir və onun genişləndirilməsi istiqamətində işlər davam etdirilir.
Sonda Prezident İlham Əliyev Gürcüstan xalqına sülh və rifah arzulayıb, göstərilən qonaqpərvərliyə görə təşəkkürünü bildirib.
Qeyd edək ki, görüş çərçivəsində tərəflər ikitərəfli münasibətlərlə yanaşı, regional təhlükəsizlik və əməkdaşlıq məsələlərini də geniş müzakirə ediblər.
