Azərbaycan Respublikasının Prezidenti İlham Əliyev və birinci xanım Mehriban Əliyeva aprelin 8-də Milli Aviasiya Akademiyası ərazisində yaradılmış Beynəlxalq Təlim Mərkəzinin açılışında iştirak ediblər.
Qanuntv.az xəbər verir ki, akademiyanın rektoru Arif Paşayev, rəqəmsal inkişaf və nəqliyyat naziri Rəşad Nəbiyev və Azərbaycan Hava Yolları QSC-nin İdarə Heyətinin sədri Samir Rzayev dövlət başçısına və birinci xanıma mərkəzin fəaliyyəti barədə ətraflı məlumat veriblər.
Bildirilib ki, Beynəlxalq Təlim Mərkəzi “Azərbaycan Hava Yolları” QSC-nin təşəbbüsü ilə yaradılıb və əsas məqsəd uçuş heyətinin fövqəladə hallara hazırlığının artırılması, həmçinin hava hərəkətini idarə edən dispetçerlərin nəzəri və praktiki biliklərinin təkmilləşdirilməsidir.
Mərkəzdə təlim prosesi Beynəlxalq Mülki Aviasiya Təşkilatı və Avropa İttifaqı Aviasiya Təhlükəsizliyi Agentliyi standartlarına uyğun təşkil olunacaq. Dispetçerlərin hazırlanması üçün Almaniyanın qabaqcıl aeronaviqasiya təhsil mərkəzlərindən olan Alman Aeronaviqasiya Akademiyası proqramlarından istifadə ediləcək.
Kompleksdə Heydər Əliyev Beynəlxalq Hava Limanı üzrə 360 dərəcə panoramlı TWR qüllə simulyatoru, eləcə də radar idarəetmə simulyatorları quraşdırılıb. Bu texnologiyalar dispetçerlərə real uçuş şəraitinə maksimum yaxın mühitdə təlim keçməyə imkan verir.
Bundan əlavə, hava limanlarında istifadə olunan xüsusi texnikaların idarə edilməsi üzrə müasir trenajorlar da mərkəzdə yer alıb. Hər il burada təxminən 30 dispetçerin və 3 minə yaxın hava gəmisi heyəti üzvünün hazırlanması planlaşdırılır.
Mərkəz, həmçinin Türkiyənin bu sahədə tanınmış şirkəti olan SkyArt tərəfindən təqdim edilən “A320/A321 NEO CEET” tipli simulyatorla təchiz olunub. Buraya “Boeing 787” tipli təyyarələr üzrə qapı təlim qurğuları və real yanğın şəraitini simulyasiya edən müasir sistemlər də daxildir.
Yeni təlim infrastrukturu Azərbaycanda aviasiya sahəsində kadr hazırlığının gücləndirilməsinə, beynəlxalq standartlara uyğun tədris imkanlarının genişləndirilməsinə və rəqabətqabiliyyətli mütəxəssislərin yetişdirilməsinə mühüm töhfə verəcək.
Qeyd edək ki, mərkəzin müasir texnologiyalarla təchiz olunması aviasiya mütəxəssislərinə nəzəri biliklərlə yanaşı, praktiki bacarıqları da real şəraitə yaxın mühitdə mənimsəməyə imkan yaradır ki, bu da uçuş təhlükəsizliyinin təmin olunmasında mühüm rol oynayır.
