Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə uşaq evlərində tərbiyə alan uşaqlar arasında növbəti “Dostluq Kuboku” minifutbol turniri təşkil olunub.
Qanuntv.az xəbər verir ki, AZƏRTAC-ın yaydığı məlumata görə, turnirin əsas məqsədi sosial xidmət müəssisələrində böyüyən uşaqlar arasında sağlam həyat tərzini və fiziki fəallığı təşviq etmək, onların cəmiyyətə inteqrasiyasına dəstək olmaq, eləcə də yeni dostluq münasibətlərinin formalaşmasına şərait yaratmaqdır.
Azərbaycan Futbol Federasiyaları Assosiasiyasının təşkilatçılığı ilə keçirilən yarışda Sosial Xidmətlər Agentliyinin nəzdində fəaliyyət göstərən Bakı, Gəncə, Lənkəran və Şəki şəhərlərində yerləşən uşaq evlərinin 10-11 yaşlı oğlan və qızlardan ibarət komandaları iştirak ediblər.
Komandalar “Zəfər”, “Şahinlər”, “Birlik”, “Kəpəz”, “Xan” və “Qala” adları altında mübarizə aparıblar. Yarış boyunca qızlar və oğlanlar arasında yüksək idman əzmi, komanda ruhu və dostluq münasibətləri müşahidə olunub.
Tədbirdə iştirak edən Leyla Əliyeva oyunları izləyib, komandaları dəstəkləyib, uşaqlarla səmimi söhbət aparıb və onlarla xatirə şəkilləri çəkdirib. O, iştirakçılara uğurlar arzulayaraq bu cür təşəbbüslərin davamlı keçirilməsinin vacibliyini vurğulayıb.
Turnirin sonunda qalib komandalar diplom, medal və kubokla təltif olunublar. İkinci və üçüncü yerləri qazanan komandalar da medal və diplomlarla mükafatlandırılıblar.
Tərbiyəçilər və təşkilatçılar qeyd ediblər ki, bu cür layihələr uşaqların özünəinamının artmasına, sosial əlaqələrinin möhkəmlənməsinə və onların cəmiyyətə daha fəal inteqrasiyasına mühüm töhfə verir.
Qeyd edək ki, “Dostluq Kuboku” minifutbol turniri ötən ildən etibarən ənənəvi xarakter alıb və bu il keçirilən yarış həmin təşəbbüsün uğurlu davamı kimi yadda qalıb.
