Futbol bəzən sadəcə meydanda top qovmaq deyil, tarixdə iz buraxan hadisələrin yaşıl meydandakı əksidir. Dünya futbol tarixində isə elə qarşılaşmalar var ki, onların mənası nəticədən daha böyük olur. 1974-cü ildə keçirilən Almaniya derbisi də məhz belə matçlardan biri idi.
1974-cü ildə Almaniyada təşkil olunan dünya çempionatı futbolsevərlərə bu gün də bənzəri olmayan bir mənzərə təqdim etmişdi. Həmin turnirdə bir ölkə özü-özünə qarşı oynayırdı. Çünki o dövrdə Almaniya vahid dövlət deyildi. İkinci Dünya müharibəsindən sonra ölkə iki hissəyə bölünmüşdü — kapitalist Qərbi Almaniya və sosialist Şərqi Almaniya.
Eyni millət, eyni dil və ortaq tarixə sahib olan almanlar fərqli ideologiyaların təsiri altında yaşayırdılar. Soyuq müharibənin yaratdığı siyasi qarşıdurma isə futbol meydanına qədər gəlib çıxmışdı. Tale elə gətirmişdi ki, hər iki Almaniya yığması dünya çempionatında eyni qrupa düşmüşdü.
1974-cü il iyunun 22-də Hamburqdakı “Folksparkştadion” arenasında keçirilən qarşılaşma təkcə futbol oyunu deyildi. Bu, iki sistemin, iki siyasi düşərgənin və bölünmüş bir xalqın simvolik mübarizəsi idi.
Matç zamanı tribunalarda olduqca emosional atmosfer hökm sürürdü. Eyni ailənin üzvləri fərqli komandalara azarkeşlik edirdi. Meydanda iki komanda olsa da, əslində bir xalq bir-birinə qarşı mübarizə aparırdı.
Oyunun favoriti ev sahibi Qərbi Almaniya sayılsa da, matçın taleyini Şərqi Almaniya həll etdi. Qarşılaşmanın 77-ci dəqiqəsində Yurgen Sparvasserin vurduğu yeganə qol Şərqi Almaniyaya tarixi qələbə qazandırdı. Bu nəticə sosialist blokunda böyük sevincə səbəb olmuş, qol isə illərlə siyasi və idman simvolu kimi təqdim edilmişdi.
Lakin futbolun ironiyası bundan sonra başladı. Məhz həmin məğlubiyyətdən sonra Qərbi Almaniya toparlanaraq finala qədər irəlilədi. Final qarşılaşmasında isə “total futbol”un simvoluna çevrilən Niderland millisini məğlub etdi. Əfsanəvi hücumçu Gerd Müllerin qolu Qərbi Almaniyaya dünya çempionluğunu qazandırdı.
Beləliklə, qəribə bir paradoks yaranmışdı: dünya çempionu olan Qərbi Almaniyanı həmin turnirdə məğlub edən yeganə komanda məhz Şərqi Almaniya olmuşdu.
1974-cü il Almaniya derbisi bu gün də futbol tarixinin ən siyasi, ən emosional və ən simvolik qarşılaşmalarından biri hesab olunur. Həmin matç sübut etdi ki, insanın ən çətin rəqibi bəzən qarşısındakı deyil, öz daxilindəki qarşıdurmadır.
