ABŞ Silahlı Qüvvələri İran limanına doğru hərəkət edən yük gəmisinə zərbə endirib.
Qanuntv.az xarici KİV-ə istinadən xəbər verir ki, ABŞ Silahlı Qüvvələrinin Mərkəzi Komandanlığının (CENTCOM) yaydığı məlumata görə, Qambiya bayrağı altında üzən "Lian Star" yük gəmisi hərbçilərin çoxsaylı xəbərdarlıqlarına məhəl qoymayaraq İran limanına daxil olmağa cəhd edib.
Bildirilib ki, ABŞ-yə məxsus uçuş aparatı gəminin heyəti hərbçilərin tələblərinə tabe olmaqdan imtina etdikdən sonra onun mühərrik bölməsinə "Hellfire" raketi buraxıb. Nəticədə gəmi sıradan çıxarılıb və hərəkətsiz vəziyyətə salınıb.
Məlumata görə, hadisə Oman körfəzində baş verib. ABŞ qüvvələri hələlik gəminin göyərtəsinə çıxmayıb.
Qeyd edək ki, bu, İran limanlarına tətbiq olunan blokada başlayandan bəri ABŞ hərbçilərinin güc tətbiq edərək dayandırdığı altıncı gəmi hesab olunur.
CENTCOM-un açıqlamasında həmçinin bildirilib ki, dəniz blokadası müddətində ABŞ Hərbi Dəniz Qüvvələri İranla əlaqəli 115 ticarət gəmisini geri qaytarıb.
