Türkmənistanda keçirilən Azərbaycan Mədəniyyəti Günləri çərçivəsində paytaxt Aşqabadda yerləşən Türkmənistan Dövlət Təsviri Sənət Muzeyində “Azərbaycan milli irsinin inciləri” adlı sərginin açılışı olub.
Tədbirdə Türkmənistan mədəniyyət nazirinin müavini Nursəhet Şirimov, Adil Kərimli və muzeyin direktoru İsmail Orazov çıxış edərək iki ölkə arasında mədəni əlaqələrin inkişafından danışıblar.
Sərgidə Azərbaycanın zəngin mədəni irsini əks etdirən müxtəlif sənət nümunələri nümayiş olunur. Ekspozisiyada Əzim Əzimzadənin əsərləri, ənənəvi və müəllif xalçaları, sənətkarlıq nümunələri, bədii metal və tikmə işləri yer alıb.
Ziyarətçilərə XIX əsrdən müasir dövrədək uzanan xalçaçılıq ənənələri təqdim edilir. Sərgidə, həmçinin Eldar Mikayılzadənin əl işləri nümayiş etdirilir.
Məkan daxilində qurama sənəti nümunələri, şəbəkə sənətinə aid kompozisiyalar və zərgərlik ənənələri də təqdim olunur. Şəkili sənətkar Hüseyn Hacımustafazadə şəbəkə sənətinin incəliklərini ustad dərsi formatında nümayiş etdirir, zərgər Füzuli Əlizadə isə milli zərgərlik sənətinin xüsusiyyətləri barədə məlumat verir.
Sərginin maraqlı bölmələrindən biri də “Müasir modada milli naxışlar” adlı geyim kolleksiyasıdır. Burada modelyerlər Gülnarə Xəlilova və Anara Zakirlinin hazırladığı kolleksiyalar nümayiş etdirilir.
Azərbaycanın milli-mədəni dəyərlərinin kompleks şəkildə təqdim olunduğu sərgi Aşqabad sakinləri və şəhərin qonaqları tərəfindən böyük maraqla qarşılanır.
