Elm və təhsil naziri Emin Əmrullayevin müvafiq əmri ilə Elçin Vəliyev Geologiya İnstitutunda direktor müavini vəzifəsinə təyin edilib.
Qanuntv.az xəbər verir ki, həmin əmrlə Elçin Vəliyevə institutun direktor vəzifəsinin səlahiyyətlərini müvəqqəti icra etmək də həvalə olunub.
Elçin Vəliyev ali təhsilini Bakı Dövlət Universitetində coğrafiya ixtisası üzrə bakalavriat, landşaftşünaslıq ixtisası üzrə magistratura səviyyəsində alıb. O, həmçinin Ukraynanın İvano-Frankovsk Milli Texniki Neft və Qaz Universitetində neft-qaz mühəndisliyi ixtisası üzrə təhsil alıb.
2018-ci ildə texnika üzrə fəlsəfə doktoru, 2024-cü ildə isə texnika elmləri doktoru elmi dərəcəsini əldə edən Elçin Vəliyev əmək fəaliyyətinə Milli Aerokosmik Agentliyin Ekologiya İnstitutunda başlayıb. O, müxtəlif illərdə neft-qaz sənayesində fəaliyyət göstərib.
2010-cu ildən etibarən SOCAR-ın Neft Qaz Elmi-Tədqiqat Layihə İnstitutunda çalışan Elçin Vəliyev son təyinata qədər Analitik Tədqiqatlar Laboratoriyasının müdiri vəzifəsində işləyib.
Elçin Vəliyev 102 elmi əsərin, o cümlədən 50 indekslənən elmi məqalənin, 40 tezisin, 5 patentin və 8 kitabın həmmüəllifidir. O, 2021-2024-cü illərdə Stanford Universitetinin tərtib etdiyi dünyanın ən nüfuzlu alimlərinin ilk 2 faiz siyahısında yer alıb.
Alim 2024-cü ildə neft-qaz sahəsinin inkişafına verdiyi töhfələrə görə SOCAR prezidenti tərəfindən fəxri fərmanla təltif edilib.
