"Quacquarelli Symonds" (QS) beynəlxalq reytinq agentliyi dünya universitetlərinin növbəti reytinq cədvəlini açıqlayıb.
Elm və Təhsil Nazirliyinin yaydığı məlumata görə, nəticələrə əsasən, Azərbaycan tarixində ilk dəfə olaraq üç ali təhsil müəssisəsi QS dünya reytinqinin TOP 800-lüyündə yer alıb.
Reytinqdə Bakı Dövlət Universiteti 123 pillə irəliləyərək dünyada 565-ci yerdə qərarlaşıb. Azərbaycan Dövlət İqtisad Universiteti əvvəlki 801-850 aralığından 634-cü yerə yüksəlib. Azərbaycan Dövlət Neft və Sənaye Universiteti isə 851-900 aralığından 711-720 mövqeyinədək irəliləyib.
Bununla yanaşı, Azərbaycan Texniki Universiteti, Xəzər Universiteti, Bakı Mühəndislik Universiteti, Azərbaycan Memarlıq və İnşaat Universiteti və ADA Universiteti də mövqelərini yaxşılaşdıraraq reytinqdə irəliləyiblər. Sumqayıt Dövlət Universiteti mövqeyini qoruyub saxlayıb, Azərbaycan Dövlət Pedaqoji Universiteti isə ilk dəfə QS reytinqinə daxil olub.
Beləliklə, QS reytinqində təmsil olunan Azərbaycan universitetlərinin sayı 10-a çatıb. TOP 1000-də yer alan universitetlərimizin sayı isə 6-dan 7-yə yüksəlib.
Qeyd edək ki, 2025-ci ilədək Azərbaycan universitetləri dünya reytinqlərinin TOP 800-lüyündə təmsil olunmayıb. 2025-ci ildə ilk dəfə bir universitetimiz bu uğura imza atmışdısa, 2026-cı ildə həmin göstərici üç universitetə yüksəlib.
Xatırladaq ki, QS-in son reytinqinə dünyanın 106 ölkəsindən 1500-dən çox universitet daxil edilib.
