Böyük Britaniyada iki sərnişin qatarının toqquşması nəticəsində bir nəfər həlak olub, onlarla insan müxtəlif dərəcəli bədən xəsarətləri alıb.
Qanuntv.az xəbər verir ki, hadisə İngiltərənin Bedford şəhəri yaxınlığında baş verib.
Məlumata görə, London istiqamətində hərəkət edən iki sərnişin qatarı naməlum səbəbdən toqquşub. Qəza nəticəsində qatar maşinistlərindən biri həyatını itirib.
Rəsmi məlumatlara əsasən, ümumilikdə 89 nəfər xəsarət alıb. Onlardan 11-nin vəziyyəti çox ağır, 22 nəfərin vəziyyəti isə ağır qiymətləndirilir. Digər yaralılar hadisə yerində və ya xəstəxanalarda tibbi yardım alıblar.
Hadisə yerinə çoxsaylı təcili tibbi yardım briqadaları, xilasedicilər və polis əməkdaşları cəlb olunub. Bölgədə genişmiqyaslı xilasetmə əməliyyatı aparılıb.
Qəzanın başvermə səbəbi hələlik məlum deyil. Böyük Britaniyanın nəqliyyat qurumları və Dəmir Yolu Qəzalarının Araşdırılması İdarəsi tərəfindən hadisə ilə bağlı araşdırmalara başlanılıb.
Qeyd edək ki, bu hadisə son illərdə Böyük Britaniyada baş verən ən ağır dəmir yolu qəzalarından biri hesab olunur.
