Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə Azərbaycanın ümumtəhsil müəssisələrinin müəllimlərinə həsr olunmuş Xeyirxahlıq Festivalı təşkil olunub.
QanunTV.az xəbər verir ki, IDEA İctimai Birliyi, Azərbaycan Respublikasının Elm və Təhsil Nazirliyi və “ThinkIn” təşkilatının əməkdaşlığı çərçivəsində keçirilən tədbirdə ölkənin 290 ümumtəhsil müəssisəsindən 1000-ə yaxın müəllim iştirak edib.
Mərkəzi Nəbatat Bağında açıq hava formatında təşkil olunan festivalda Leyla Əliyeva və Alyona Əliyeva da iştirak ediblər.
Festival çərçivəsində müxtəlif fəaliyyət zonaları yaradılıb. İştirakçılar milli zona, sənət emalatxanaları, yoqa və meditasiya sessiyaları, əl işləri yarmarkası və digər interaktiv məkanlarla tanış olublar. Leyla Əliyeva və Alyona Əliyeva müəllimlərlə səmimi söhbətlər edib, tədbirdə iştirak edənlərlə xatirə şəkilləri çəkdirib və məktəblilərin yaradıcı çıxışlarını izləyiblər.
Tədbirin rəsmi hissəsində çıxış edən Leyla Əliyeva müəllimlərin cəmiyyətin inkişafında mühüm rol oynadığını vurğulayıb. O bildirib ki, hər bir uşaq özünəməxsus istedad və potensiala malikdir, həmin imkanların üzə çıxarılmasında müəllimlərin və valideynlərin rolu böyükdür.
Leyla Əliyeva müəllimlərə məsuliyyətli və fədakar fəaliyyətlərinə görə təşəkkür edib.
Festival çərçivəsində keçirilən panel müzakirəsində məktəblərdə xeyirxahlıq, mərhəmət, qarşılıqlı hörmət və empatiya dəyərlərinin təşviqi məsələləri müzakirə olunub. Müzakirələrdə təhsil nümayəndələri müəllimlərin gələcək nəslin formalaşmasındakı əhəmiyyətini qeyd ediblər.
Tədbirdə həmçinin “Xeyirxahlıq Marafonu”nun qaliblərinin mükafatlandırılması mərasimi keçirilib. Məktəblər arasında xeyirxahlıq mövzusunda hazırlanmış yaradıcı sosial media layihələri müxtəlif nominasiyalar üzrə qiymətləndirilib.
Festival konsert proqramı ilə başa çatıb.
Qeyd edək ki, Xeyirxahlıq Festivalının əsas məqsədi müəllimlərə olan hörmət və minnətdarlığı ifadə etmək, məktəblərdə sağlam, mərhəmətli və qarşılıqlı dəstəyə əsaslanan təhsil mühitinin təşviqinə töhfə verməkdir.
