İranın keçmiş ali rəhbəri Əli Xameneinin dəfn mərasimi onun doğma şəhəri Məşhəddə başa çatıb. O, Məşhəd şəhərində yerləşən İmam Rza məqbərəsində torpağa tapşırılıb.

Məlumata görə, Əli Xameneinin cənazəsi iki il əvvəl helikopter qəzasında həyatını itirən keçmiş İran prezidenti İbrahim Rəisinin dəfn olunduğu ərazidə dəfn edilib.

Vida mərasimində iştirak edən insanların sayının çoxluğu səbəbindən təhlükəsizlik tədbirləri gücləndirilib. Yüzminlərlə insanın iştirak etdiyi matəm yürüşü zamanı təşkilatçılar marşrutu dəyişmək məcburiyyətində qalıblar. Bildirilir ki, izdiham səbəbindən dəfn karvanının hərəkəti çətinləşib və müəyyən mərhələdə helikopterdən istifadə olunub.

İmam Rza məqbərəsinin ərazisində keçirilən mərasimdə ölkənin müxtəlif bölgələrindən, eləcə də xarici dövlətlərdən gələn rəsmi şəxslər, din xadimləri və vətəndaşlar iştirak ediblər. Əli Xamenei və onunla birlikdə həlak olan ailə üzvlərinin xatirəsinə dualar oxunub və xüsusi dini mərasim keçirilib.

Bununla da iyulun əvvəlindən Tehran, Qum, eləcə də İraqın müqəddəs şəhərləri hesab olunan Nəcəf və Kərbəlada təşkil edilən anım və matəm tədbirləri yekunlaşıb.

Qeyd edək ki, İranın keçmiş ali rəhbəri Əli Xameneinin bu ilin fevralın 28-də ABŞ və İsrailin endirdiyi zərbələr nəticəsində həlak olduğu bildirilir.