Azərbaycan Respublikasının Prezidenti İlham Əliyev iyulun 11-də "Xankəndi" hotelinin açılış mərasimində iştirak edib.

Qanuntv.az xəbər verir ki, Azərbaycan Respublikası Prezidentinin İşlər müdiri Ramin Quluzadə dövlət başçısına "Xankəndi" Mehmanxana Kompleksinə aid olan hoteldə yaradılmış şərait barədə ətraflı məlumat verib.

Bildirilib ki, dördmərtəbəli hotel binasında qonaqların rahatlığı üçün bütün zəruri şərait yaradılıb. Hoteldə ümumilikdə 101 otaq mövcuddur. Bunlardan 92-si "deluxe", 4-ü "superior", 3-ü "deluxe suite", 2-si isə "executive suite" kateqoriyasına aiddir.

Məlumata görə, hotel eyni vaxtda 236 qonağın qəbulunu təmin etmək imkanına malikdir. Burada kafe, restoranlar və idman zalı da fəaliyyət göstərəcək.

Layihə çərçivəsində ümumilikdə 45 yeni iş yerinin yaradılması nəzərdə tutulub. İşlə təmin olunacaq şəxslərdən 20-si işğaldan azad edilmiş şəhər və rayonların sakinləridir.

Qeyd olunub ki, işğaldan azad edilmiş ərazilərdə turizm infrastrukturunun inkişafı dövlət siyasətinin prioritet istiqamətlərindən biridir. Bu baxımdan qədim tarixə malik Xankəndi şəhərində müasir hotellərin, istirahət mərkəzlərinin və müxtəlif xidmət obyektlərinin yaradılması şəhərin sosial-iqtisadi dirçəlişinə mühüm töhfə verir.

Yeni istifadəyə verilən "Xankəndi" hotelinin fəaliyyəti həm yerli, həm də xarici turistlər üçün yüksək standartlara cavab verən müasir xidmət mühitinin formalaşdırılmasına xidmət edəcək. Eyni zamanda, bu layihə Xankəndidə aparılan genişmiqyaslı bərpa və quruculuq işlərinin sürətini və şəhərin inkişaf potensialını bir daha nümayiş etdirir.

Qanuntv.az