Azərbaycan–Türkiyə Birgə Hökumətlərarası Komissiyasının 12-ci iclası Bakıda keçiriləcək
Azərbaycan ilə Türkiyə arasında iqtisadi əməkdaşlıq üzrə Birgə Hökumətlərarası Komissiyanın 12-ci iclası Bakıda baş tutacaq.
QanunTV.az xəbər verir ki, bu barədə Türkiyənin Azərbaycandakı səfirliyi məlumat yayıb.
Bildirilib ki, Komissiyanın növbəti iclası dekabrın 22–23-də keçiriləcək. İclasda iştirak etmək üçün Türkiyənin vitse-prezidenti Cevdet Yılmazın rəhbərlik etdiyi nümayəndə heyəti Azərbaycana səfər edəcək. Toplantıya Azərbaycan tərəfdən Baş nazir Əli Əsədov sədrlik edəcək.
İclas çərçivəsində iki ölkə prezidentləri tərəfindən müəyyən edilmiş 15 milyard dollarlıq ticarət dövriyyəsi hədəfinə nail olmaq istiqamətində görüləcək tədbirlər və əməkdaşlıq imkanları müzakirə olunacaq.
Komissiyanın iclası ilə paralel olaraq Bakıda II Azərbaycan–Türkiyə İnvestisiya Forumu da keçiriləcək. Forumun əsas məqsədi iqtisadi əlaqələrin daha da dərinləşdirilməsi, iş adamlarının bir araya gətirilməsi və ortaq investisiya imkanlarının genişləndirilməsidir.
Bundan əlavə, MÜSİAD xətti ilə türk və azərbaycanlı iş adamlarının görüşünün keçirilməsi də nəzərdə tutulur.
Rəsmi məlumatlara əsasən, Türkiyə uzun illərdir Azərbaycanın əsas ticarət tərəfdaşlarından biridir. 2024-cü ildə Türkiyənin Azərbaycana ixracı 3,1 milyard dollar, Azərbaycandan idxalı isə 4,8 milyard dollar təşkil edib. Hazırda Türkiyə Azərbaycanın ən çox ixrac etdiyi ikinci, idxal etdiyi isə üçüncü ölkədir.
Qeyd edək ki, Azərbaycan ilə Türkiyə arasında iqtisadi əməkdaşlıq üzrə Birgə Hökumətlərarası Komissiyanın 11-ci iclası ötən ilin may ayında Ankara şəhərində keçirilib.
