Rusiya Dövlət Duması ölkənin silahlı qüvvələrində və ya hərbi birləşmələrində döyüşmüş əcnəbilərlə bağlı mühüm qərar qəbul edib.
QanunTV.az xəbər verir ki, Dövlət Duması bu kateqoriyadan olan şəxslərin deportasiyasını və cinayət məsuliyyətinə cəlb edilməsi məqsədilə ekstradisiyasını qadağan edən qanun layihələri paketini birinci oxunuşda qəbul edib.
Məlumata görə, Ədliyyə Nazirliyi tərəfindən hazırlanan paket üç qanun layihəsindən ibarətdir. Layihələrdən biri Cinayət Prosessual Məcəlləsinə dəyişiklik edilərək Rusiya tərəfində döyüşmüş əcnəbilərin cinayət təqibi üçün başqa ölkələrə verilməsini qadağan edir. Digər təşəbbüs isə İnzibati Xətalar Məcəlləsinə dəyişiklik etməklə onların deportasiyasının qarşısını alır.
Qanun layihəsinə əsasən, deportasiya əvəzinə bu şəxslər 50 min rubla qədər cərimə ediləcək və ya 200 saata qədər ictimai işlərə cəlb olunacaqlar. Dəyişikliklərin məqsədi Rusiya silahlı qüvvələrində xidmət etmiş əcnəbiləri və vətəndaşlığı olmayan şəxsləri Rusiyaya girişə qadağa qoyulması və deportasiya riskindən qorumaqdır.
Sənəddə həmçinin qeyd olunur ki, Rusiya hakimiyyət orqanları bu kateqoriyaya aid əcnəbilərə müvəqqəti və ya daimi yaşayış icazəsi verməkdən imtina etmək səlahiyyətindən məhrum edilir. Artıq verilmiş yaşayış sənədləri ləğv edilə və ya onların etibarlılıq müddəti qısaldıla bilməz.