Azərbaycan Respublikasının Prezidenti İlham Əliyev aprelin 2-də Türkiyə Respublikasının vitse-prezidenti Cevdet Yılmazın başçılıq etdiyi nümayəndə heyətini qəbul edib.
Qanuntv.az xəbər verir ki, görüş zamanı Cevdet Yılmaz Türkiyə Prezidenti Rəcəb Tayyib Ərdoğanın salamlarını dövlət başçısına çatdırıb. Prezident İlham Əliyev salamlara görə minnətdarlığını bildirib və öz salamlarını da Türkiyə liderinə çatdırmağı xahiş edib.
Görüşdə Türkiyənin hər zaman Azərbaycanın yanında olduğu qeyd olunub və bunun Şuşa Bəyannaməsinin əsas prinsiplərindən biri olduğu vurğulanıb. Prezident İlham Əliyev də Azərbaycanın hər zaman Türkiyənin yanında olduğunu bildirib.
Tərəflər Azərbaycanla Türkiyə arasında qardaşlıq və strateji müttəfiqlik münasibətlərinin uğurla inkişaf etdiyini, qarşılıqlı səfərlərin bu əlaqələrin daha da möhkəmlənməsinə xidmət etdiyini diqqətə çatdırıblar.
Söhbət zamanı Bakıda Türk Dövlətləri Təşkilatına üzv ölkələrin hökumət başçılarının və vitse-prezidentlərinin görüşünün əhəmiyyəti vurğulanıb.
Görüşdə, həmçinin Azərbaycanla Türkiyə arasında əməkdaşlığın perspektivləri, regional vəziyyət və qarşılıqlı maraq doğuran digər məsələlər ətrafında fikir mübadiləsi aparılıb.
