Prezident İlham Əliyevin sosial şəbəkə hesablarında Şuşa rayonunun Böyük Qaladərəsi kəndində sakinlərlə görüşünə dair paylaşım edilib.

Qanuntv.az xəbər verir ki, paylaşımda dövlət başçısının görüş zamanı səsləndirdiyi fikirlərə yer verilib.

Prezident İlham Əliyev bildirib ki, ulu öndər Heydər Əliyevin hakimiyyətə qayıdışı Azərbaycanın taleyində mühüm rol oynayıb:

“Əgər o vaxt ulu öndər Heydər Əliyev hakimiyyətə gəlməsəydi, indi xalqımızın, dövlətimizin taleyi necə olacaqdı, onu demək çətindir. Hər halda o vaxt Azərbaycan böyük fəlakətlə üz-üzə idi”.

Dövlət başçısı qeyd edib ki, həmin dövrdə müharibə dayandırılıb, ölkədə inkişaf mərhələsi başlayıb və gələcək qələbə üçün güc toplanılıb.

Prezident İlham Əliyev Vətən müharibəsində əldə olunan qələbədən də danışaraq vurğulayıb ki, işğaldan azad edilən ərazilərin mürəkkəb relyefi və qurulan müdafiə xətləri Azərbaycan Ordusunun qarşısında ciddi maneələr yaradıb:

“Bizim qəhrəman övladlarımız sinələrini qabağa verərək, özlərini qurban verərək o xətləri yardılar və cəmi 44 gün ərzində biz Ermənistanı kapitulyasiya aktına imza atmağa məcbur etdik”.

Prezident əlavə edib ki, Azərbaycanın qazandığı bu Zəfər tarixdə mütləq qələbə nümunəsi kimi yadda qalıb:

“Nə ondan qabaq, nə də ondan sonra bu dərəcədə mütləq Qələbə olmamışdır”.