2025/2026-cı illər mövsümünü Azərbaycan Premyer Liqasında üçüncü pillədə başa vuraraq UEFA Konfrans Liqasına vəsiqə qazanan "Turan-Tovuz" futbol klubu UEFA-nın qərarı ilə 2026/2027 mövsümündə Avropa turnirlərində iştirak hüququndan məhrum edilib.
QanunTV.az xəbər verir ki, bu barədə klubun yaydığı rəsmi məlumatda bildirilib.
Qeyd olunub ki, UEFA İntizam Komitəsi klubun turnirdə iştirakı üçün tələb olunan meyarları araşdırıb.
Araşdırma zamanı AFFA İntizam Komitəsinin 13 dekabr 2019-cu il tarixli qərarı əsas götürülüb.
Həmin qərara əsasən, 2019/2020 mövsümündə I Divizionda çıxış edən komandanın yeddi futbolçusunun futbolla bağlı bütün növ fəaliyyətinə qadağa qoyulmuşdu. UEFA da bu faktı nəzərə alaraq "Turan-Tovuz"un 2026/2027 mövsümündə təşkilatın himayəsi altında keçirilən yarışlarda iştirakını məhdudlaşdırıb.
Klub isə qərarla razılaşmadığını bəyan edib. Bildirilib ki, komanda UEFA Konfrans Liqasına vəsiqəni tamamilə idman prinsipləri əsasında qazanıb və verilmiş qərarın dəyişdirilməsi üçün bütün hüquqi imkanlardan istifadə olunacaq.
Məlumata görə, məsələ ilə bağlı yaxın günlərdə İdman Arbitraj Məhkəməsinə (CAS) müraciət ediləcək.
Bununla yanaşı, klub avrokuboklara hazırlıq planlarında hər hansı dəyişiklik etmədiyini açıqlayıb. Bildirilib ki, komanda bu ay bir araya gələrək mövsümöncəsi hazırlıq üçün Türkiyədə təlim-məşq toplanışına yollanacaq.
"Turan-Tovuz" rəhbərliyi UEFA-nın qərarının yenidən nəzərdən keçiriləcəyinə ümid etdiyini vurğulayıb.
