Azərbaycan milli komandasının baş məşqçisi Ayxan Abbasov Malta və San-Marino ilə keçiriləcək yoldaşlıq oyunları öncəsi komandanın hazırkı durumunu dəyərləndirib.
O bildirib ki, Millətlər Liqası öncəsi keçirilən son təlim-məşq toplanışında futbolçuların yüksək motivasiya və istək nümayiş etdirməsi məşqçilər korpusunu sevindirir.
"Çempionatın ağır mövsümündən sonra futbolçuların bu qədər istəkli və motivasiyalı olması bizi sevindirir. Malta və San-Marino ilə iki yoldaşlıq görüşümüz var. Bu oyunlarda bütün futbolçuları iş başında görmək istəyirik. Həm yaxşı oyun, həm də yaxşı nəticə arzulayırıq", – deyə baş məşqçi bildirib.
Ayxan Abbasov Bakı və Avstriyada keçirilən hazırlıq prosesinin komandada müsbət atmosfer yaratdığını vurğulayıb. Onun sözlərinə görə, futbolçuların məşqlərdəki əzmkarlığı və istəyi qarşıdakı oyunlara inamı artırır.
Baş məşqçi qeyd edib ki, yoldaşlıq görüşləri heyətdə rotasiya aparmaq və bütün futbolçulara şans vermək baxımından vacib əhəmiyyət daşıyır. Bununla yanaşı, o, qələbənin hər zaman əsas məqsəd olduğunu bildirib.
Rəqiblər barədə danışan Abbasov Malta millisinin son illərdə inkişaf etdiyini və ciddi rəqibə çevrildiyini deyib. O, həmçinin Millətlər Liqasında Azərbaycan millisinin qarşılaşacağı Litva və Lixtenşteyn yığmalarının da hazırlıq prosesində nəzərə alındığını qeyd edib.
Ayxan Abbasov Malta millisini Azərbaycan üçün "tərs rəqib" adlandırsa da, qarşıdakı görüşdə qələbə qazanmağa çalışacaqlarını vurğulayıb.
Baş məşqçi San-Marino ilə keçiriləcək oyunda isə fərqli heyətə üstünlük veriləcəyini və bir çox futbolçuya şans yaradılacağını açıqlayıb.
O, həmçinin milli komandanın üzvü Elvin Cəfərquliyevin gələcək karyerası ilə bağlı nikbin olduğunu bildirib. Abbasov futbolçunun motivasiyalı olduğunu, yaxın zamanda yeni klub tapacağına və oyun praktikası ilə bağlı problem yaşamayacağına inandığını söyləyib.
Qeyd edək ki, Azərbaycan millisi Avstriya toplanışı çərçivəsində iyunun 5-də Malta, iyunun 9-da isə San-Marino yığması ilə yoldaşlıq görüşü keçirəcək. Macarıstanın Sombatxey şəhərində yerləşən "Haladaş" stadionunda baş tutacaq hər iki qarşılaşma Bakı vaxtı ilə saat 22:00-da başlayacaq.
