İyunun 26-da Heydər Əliyev Fondunun vitse-prezidenti Leyla Əliyeva və Bakı Media Mərkəzinin rəhbəri Arzu Əliyeva Bakı Bulvarında keçirilən “CandyFest” yay festivalında olublar.
QanunTV.az xəbər verir ki, qonaqlara festivalın proqramı və təşkil olunan tədbirlər barədə məlumat verilib.
Bildirilib ki, iyunun 1-dən başlayan festival iyul ayının sonunadək davam edəcək. Festival çərçivəsində müxtəlif yaş qrupları üçün əyləncəli proqramlar, təqdimatlar, yarmarka və interaktiv tədbirlər təşkil olunur.
Ziyarət zamanı Leyla Əliyeva və Arzu Əliyeva festival ərazisindəki köşklərə baş çəkib, təqdim olunan təamların dadına baxıb, ziyarətçilərlə görüşüb və xatirə şəkilləri çəkdiriblər.
Daha sonra qonaqlar açıq səma altında nümayiş olunan “Sehrli mirvari” su sirki şousunu izləyiblər. Tamaşada işıq, musiqi və akrobatik elementlərdən istifadə olunaraq nağıl qəhrəmanlarının iştirakı ilə maraqlı proqram təqdim edilib.
