"Qarabağ" Futbol Klubunda növbəti transfer ayrılığı rəsmiləşib. Ağdam təmsilçisi kolumbiyalı hücumçu Kamilo Duranın Şotlandiyanın "Seltik" klubuna transfer olunması ilə bağlı təklifi qəbul edib.
Klubun yaydığı rəsmi məlumata əsasən, futbolçunun şəxsi istəyi də nəzərə alınaraq tərəflər arasında aparılan danışıqlar uğurla başa çatıb və transfer üzrə yekun razılıq əldə olunub.
2025-ci ilin yayından etibarən "Qarabağ"ın şərəfini qoruyan Kamilo Duran qısa müddətdə komandanın əsas oyunçularından birinə çevrilməyi bacarıb. O, Ağdam klubunun heyətində keçirdiyi 45 qarşılaşmada 15 qol vuraraq komandanın uğurlarında mühüm rol oynayıb.
Kolumbiyalı hücumçu "Qarabağ"la birlikdə UEFA Çempionlar Liqasının Liqa mərhələsində çıxış edib, həmçinin komandanın pley-off mərhələsinə yüksəlməsinə töhfə verən futbolçulardan biri olub.
Kamilo Duranın "Seltik"ə transferi həm futbolçunun karyerasında yeni mərhələnin başlanğıcı, həm də Azərbaycan futbolunun beynəlxalq arenada diqqət mərkəzində olmasının növbəti göstəricisi kimi qiymətləndirilir.
"Qarabağ" klubunun yaxın günlərdə hücum xəttində yaranan boşluğu doldurmaq üçün yeni transferlər həyata keçirəcəyi də istisna edilmir.
