Rusiyanın Kabarda-Balkar Respublikasında yerləşən Elbrus zirvəsində altı alpinistin köməksiz vəziyyətdə qalması səbəbindən axtarış-xilasetmə əməliyyatına start verilib.

Rusiya Fövqəladə Hallar Nazirliyinin regional idarəsinin yaydığı məlumata görə, altı nəfərdən ibarət alpinist qrupu 5 100 metr yüksəklikdən müstəqil şəkildə enə bilmədiklərini bildirərək xilasedicilərdən yardım istəyib.

İlkin məlumata əsasən, hadisə nəticəsində xəsarət alan olmayıb.

Hazırda xilasedicilər alpinistlərin təhlükəsiz şəkildə dağdan endirilməsi üçün əməliyyatı davam etdirirlər.

Məlumata görə, hazırda Elbrus bölgəsində turist marşrutları üzrə ümumilikdə 130 qrup qeydiyyatdan keçib. Bu qruplarda 1 077 nəfər turist və alpinist iştirak edir.

Qeyd edək ki, Elbrus dağında bundan əvvəl də faciəvi hadisə qeydə alınıb. Belə ki, ata və onun 11 yaşlı oğlu dağa qalxarkən 4 min metrdən çox yüksəklikdən yıxılıb. Hadisə nəticəsində uşaq həyatını itirib, atası isə hər iki ayağından ağır xəsarət alıb.