Şəki Ağır Cinayətlər Məhkəməsində qəsdən adam öldürməkdə təqsirləndirilən Teymur Səfərəliyevin cinayət işi üzrə məhkəmədə verdiyi ifadə məlum olub.
Məhkəmə iclasında Teymur Səfərəliyev elan olunmuş ittiham üzrə özünü qismən təqsirli bilib. O, Dəmir Eyvazovu xüsusi amansızlıqla öldürmədiyini bildirib.
Təqsirləndirilən şəxsin sözlərinə görə, Dəmir Eyvazov uzun müddət onu narahat edib və müxtəlif dövlət qurumlarına, o cümlədən Qəbələ Rayon Prokurorluğuna onunla bağlı şikayətlər edib. Səfərəliyev iddia edib ki, hadisədən əvvəlki 10 gün ərzində Eyvazov hər gün bir neçə dəfə onun evinə gələrək 10 min manat məbləğində aliment borcunun onun tərəfindən ödənilməsini tələb edib.
O, həmçinin Dəmir Eyvazovun böyük oğlunu öldürməklə hədələdiyini iddia edib.
Teymur Səfərəliyev bildirib ki, hadisə günü Dəmir Eyvazovla birlikdə meşəyə gedərək quru odunları yük avtomobilinə yığmağa başlayıblar. İfadəsinə görə, iş zamanı aralarında mübahisə yaranıb və Eyvazov onu təhqir etməyə başlayıb.
Təqsirləndirilən şəxs deyib ki, əlində ot biçmək üçün istifadə etdiyi dəhrə olub. O, əvvəlcə Eyvazovu qorxutmaq məqsədilə dəhrə ilə bel nahiyəsindən vurduğunu, Eyvazov yerə yıxıldıqdan sonra isə baş nahiyəsinə zərbə endirdiyini bildirib.
Səfərəliyev ümumilikdə neçə zərbə vurduğunu xatırlamadığını deyib. Onun sözlərinə görə, baş nahiyəsinə zərbələrdən sonra Dəmir Eyvazov hərəkətsiz vəziyyətdə qalıb.
"Mən həmin an onun ölüb-ölmədiyini bilmirdim. Əvvəlcədən onu öldürmək niyyətim olmayıb", - deyə təqsirləndirilən şəxs ifadəsində bildirib.
Teymur Səfərəliyev hadisədən sonra prokurorluğa gedərək təslim olduğunu söyləyib. O, həmçinin avtomobilindən aşkar edilən dəhrənin hadisə zamanı istifadə etdiyi alət olmadığını, Eyvazovu vurduğu dəhrəni hadisə yerində qoyduğunu iddia edib.
İttihama əsasən, 1986-cı il təvəllüdlü Teymur Səfərəliyev uşaqlıq illərindən tanıdığı həmkəndlisi, 1974-cü il təvəllüdlü Dəmir Eyvazovu qəsdən öldürərək həyatdan məhrum edib.
Hadisə 16 iyun 2025-ci ildə saat 17 radələrində Qəbələ rayonunun Solquca kəndində baş verib.
Şəki Ağır Cinayətlər Məhkəməsinin hökmü ilə Teymur Səfərəliyev 10 il 6 ay müddətinə azadlıqdan məhrum edilib.
Qanuntv.az
