Azərbaycan Respublikasının Dövlət Təhlükəsizliyi Xidməti (DTX) tərəfindən davam etdirilən antiterror və əməliyyat-axtarış tədbirləri çərçivəsində 2009-cu ildən beynəlxalq axtarışda olan Namiq Rəşid oğlu Ağalarovun saxlanılaraq Azərbaycana gətirilməsi və istintaqa cəlb olunması təmin edilib.

Qanuntv.az xəbər verir ki, bu barədə Dövlət Təhlükəsizliyi Xidməti məlumat yayıb.



Məlumata görə, Namiq Ağalarov 2008–2009-cu illərdə Əfqanıstan, Pakistan və digər ölkələrdə qanunsuz silahlı birləşmələrin tərkibində fəaliyyət göstərməkdə ittiham olunur.

İstintaq materiallarına əsasən, o, BMT mandatı ilə fəaliyyət göstərən Beynəlxalq Təhlükəsizliyə Yardım Qüvvələrinin şəxsi heyətinə qarşı silahlı pusquların qurulması, məsafədən idarə olunan partlayıcı qurğulardan istifadə edilməsi, beynəlxalq təşkilatların nümayəndələrinə, müxtəlif ölkələrin beynəlxalq missiyalarda iştirak edən vətəndaşlarına, eləcə də logistika şəbəkələrinə qarşı silahlı hücumların təşkilində iştirak etməkdə şübhəli bilinir.

DTX-nin məlumatında qeyd olunur ki, Namiq Ağalarov uzun illər ərzində məsuliyyətdən yayınmaq məqsədilə müxtəlif adlardan istifadə edərək ayrı-ayrı ölkələrdə gizlənib.

Bundan əlavə, onun cihad və radikal dini ideologiyanın təbliği ilə məşğul olduğuna dair məlumatların mövcud olduğu bildirilib.

Hazırda Namiq Ağalarov Azərbaycana gətirilib və barəsində istintaq tədbirləri həyata keçirilir. İş üzrə araşdırmaların nəticəsindən asılı olaraq onun əməllərinə hüquqi qiymət veriləcək.

Hadisə Azərbaycanın milli təhlükəsizliyinə və beynəlxalq terrorçuluqla mübarizəyə qarşı yönəlmiş təhdidlərin qarşısının alınması istiqamətində həyata keçirilən əməliyyat tədbirlərinin davamı kimi qiymətləndirilir.