???????????????? Azərbaycan Prezidenti İlham Əliyev İtaliyanın Baş naziri Corcia Melonini ölkə tarixində ən uzun müddət xidmət etmiş Baş nazir olması münasibətilə təbrik edib.

Azərbaycan Prezidenti bununla bağlı “X” sosial şəbəkə hesabında paylaşım edib.

Dövlət başçısı paylaşımında Corcia Meloninin uzunmüddətli siyasi fəaliyyətini yüksək qiymətləndirərək onun güclü liderliyini, siyasi qətiyyətini və İtaliya xalqının etimadını əks etdirən mühüm tarixi mərhələ olduğunu vurğulayıb.

İlham Əliyev həmçinin Baş nazir Meloninin Azərbaycan ilə İtaliya arasında strateji tərəfdaşlığın möhkəmləndirilməsindəki şəxsi rolunu və dəyərli töhfəsini xüsusi qeyd edib.

Prezident paylaşımında iki ölkə arasında mövcud dostluq münasibətlərinin və qarşılıqlı faydalı əməkdaşlığın bundan sonra da inkişaf edəcəyinə əminliyini ifadə edib.

“Əminəm ki, dostluğumuz və qarşılıqlı faydalı əməkdaşlığımız ölkələrimizin və xalqlarımızın rifahı naminə daha da dərinləşəcək və genişlənəcək”, – deyə dövlət başçısı bildirib.