İran ABŞ və İsrail tərəfindən səsləndirilən təhdidlərdən sonra ölkənin yeni ali rəhbərinin təyinatını təxirə salıb. Bu barədə məlumatı “The New York Times” qəzeti iki İran rəsmisinə istinadən yayıb.

Nəşrin məlumatına görə, ali lider Əli Xamenei vəfat etdikdən sonra onun varisinin müəyyənləşdirilməsi təhlükəsizlik səbəbləri ilə bağlı təxirə salınıb. ABŞ və İsrail rəsmilərinin yeni liderin də hədəfə çevrilə biləcəyi barədə açıqlamaları Tehran üçün ciddi narahatlıq yaradıb.

Qəzet qeyd edib ki, Xameneinin oğlu Müctəba Xamenei mümkün əsas namizədlərdən biri hesab olunur və onun təhlükəsizliyi ilə bağlı narahatlıqlar artıb. İsrail müdafiə naziri bildirib ki, İran tərəfindən seçilən yeni lider “məhv edilməli hədəf” olacaq, ABŞ Prezidenti isə Müctəba Xameneinin namizədliyini qəbuledilməz saydığını bəyan edib.

Bu qərar İranın ali rəhbərliyinin varis seçimi prosesinin hələ yekunlaşmadığını göstərir və regiondakı gərgin geosiyasi vəziyyət fonunda təhlükəsizlik məsələlərinin xüsusi əhəmiyyət kəsb etdiyini ortaya qoyur.