Hantavirus otaq temperaturunda uzun müddət – təxminən iki həftəyədək aktivliyini qoruyub saxlaya bilər. Bu barədə Novosibirsk Dövlət Universitetinin Tibb və Tibbi Texnologiyalar İnstitutunun həkim-infeksionisti Yuliya Yermolayeva TASS-a açıqlamasında bildirib.

Mütəxəssisin sözlərinə görə, virus üçün ən əlverişli şərait yüksək rütubətlə birlikdə 4°C-yə yaxın aşağı temperaturdur. Bu isə xüsusilə sərin və rütubətli mühitlərdə patogenin daha uzun müddət yaşaya bilməsinə şərait yaradır.

Yermolayeva qeyd edib ki, hantavirus infeksiyasına yoluxma halları ilboyu qeydə alınsa da, ən çox artım yay və payız aylarında müşahidə olunur. Bunun əsas səbəbi hava şəraiti deyil, insanların davranışları ilə bağlıdır. Belə ki, isti aylarda insanlar daha çox təbiətdə vaxt keçirir, bağ evlərində işləyir, meşə ərazilərinə gedir, kənd təsərrüfatı və tikinti işləri ilə məşğul olurlar.
Eyni zamanda bu dövrdə virusun əsas daşıyıcıları olan gəmiricilərin sayında da artım qeydə alınır.

Həkim xəbərdarlıq edib ki, qış mövsümündə yoluxma mexanizmi dəyişsə də risk tam aradan qalxmır. Soyuq havalarda siçan və siçovullar daha isti məkanlara – tövlələrə, qarajlara və yaşayış evlərinə daxil olur. Bu isə qapalı və zəif ventilyasiya olunan məkanlarda hava-toz yolu ilə yoluxma riskini artırır.

Mütəxəssis əlavə edib ki, qış aylarında insanların immun sisteminin zəifləməsi və qapalı məkanlarda daha çox vaxt keçirməsi də yoluxma ehtimalını yüksəldir.

Qeyd edək ki, Ümumdünya Səhiyyə Təşkilatı (ÜST) son günlərdə “MV Hondius” kruiz laynerində hantavirusun yayılması ilə bağlı məlumat yayıb. Argentinadan Kabo-Verdeyə gedən gəmidə bir neçə yoluxma faktı qeydə alınıb və üç nəfərin həyatını xilas etmək mümkün olmayıb.

Daha sonra gəmi İspaniyanın Tenerife limanına yan alıb və sərnişinlərin təxliyəsinə başlanılıb. ÜST rəhbəri Tedros Adhanom Qebreyesus təxliyə prosesinin 10 uçuşla həyata keçiriləcəyini bildirib. İlk mərhələdə 14 İspaniya vətəndaşı xəstəxanalara yerləşdirilib.