Britaniya ordusu Estoniyanın Rusiya ilə birbaşa sərhədində yerləşən Vorumaa bölgəsinə "Challenger 2" əsas döyüş tankları göndərib.
Qanuntv.az xəbər verir ki, bu barədə "Military Watch Magazine" nəşri məlumat yayıb.
Bildirilib ki, tanklar Şotlandiya Kral Alayının 2-ci batalyonunun xidmətindədir və NATO-nun "Yaz fırtınası" adlı hərbi təlimlərində əsas rol oynayır. Təlimlər çərçivəsində şərti düşmən qüvvələri hədəf götürülür.
Məlumata görə, Britaniya tanklarının təlimlərdə iştirakı NATO-nun Rusiya sərhədləri yaxınlığında quru qoşunları bölmələrinin möhkəmləndirilməsi və hərbi mövcudluğunun genişləndirilməsi baxımından mühüm addım hesab olunur.
Digər tərəfdən, Litva Prezidentinin milli təhlükəsizlik üzrə baş müşaviri Deyvidas Matulenis bildirib ki, ABŞ Litva ərazisindən mindən çox hərbçisinin və hərbi texnikasının çıxarılmasına başlayıb.
Regionda baş verən bu proseslər NATO-nun şərq cinahında hərbi qüvvələrin yerləşdirilməsi və təhlükəsizlik məsələləri ilə bağlı müzakirələri yenidən gündəmə gətirib.
