Azərbaycanda 2025-ci ildə ilk dəfə bədxassəli yenitörəmə diaqnozu qoyulan şəxslərin sayı açıqlanıb.
QanunTV.az xəbər verir ki, Dövlət Statistika Komitəsinin məlumatına görə, ötən il ölkədə 15 144 nəfər ilk dəfə xərçəng xəstəsi kimi qeydiyyata alınıb. Onlardan 6 787-si kişi, 8 357-si isə qadındır.
Statistikaya əsasən, ilk dəfə diaqnoz qoyulan xəstələr arasında mədə xərçəngi 1 392 nəfərlə geniş yayılmış xəstəliklərdən biri olub. Traxeya, bronx və ağciyər xərçəngi üzrə 1 480, süd vəzi xərçəngi üzrə isə 2 928 nəfər qeydiyyata alınıb.
Bundan başqa, ağız boşluğu və udlaq xərçəngi üzrə 237, dodaq xərçəngi üzrə 21, qida borusu xərçəngi üzrə 463, düz bağırsaq, onunla siqmavari bağırsağın birləşməsi və anus nahiyəsinin bədxassəli yenitörəmələri üzrə 832, qırtlaq xərçəngi üzrə 199, dərinin melanoması üzrə isə 47 nəfərə ilk dəfə diaqnoz qoyulub.
Məlumatda qeyd olunur ki, bu göstəricilər əsasında ölkədə hər gün orta hesabla 41 nəfərə xərçəng diaqnozu qoyulur.
Dövlət Statistika Komitəsinin açıqladığı rəqəmlərə görə, 2025-ci ildə tibb müəssisələrində qeydiyyatda olan bədxassəli yenitörəməli xəstələrin ümumi sayı 74 004 nəfər təşkil edib. Onların 28 026-sı kişi, 45 978-i isə qadındır.
Yaş qrupları üzrə isə qeydiyyatda olan xəstələrin 952-si 0-17 yaş, 1 603-ü 18-29 yaş, 5 797-si 30-39 yaş, 32 452-si 40-59 yaş, 33 200-ü isə 60 və yuxarı yaş qrupuna aid şəxslərdir.
