"Qarabağ" Futbol Klubunun təşkilatçılığı ilə Milli Mətbuat Gününə həsr olunmuş minifutbol turniri başa çatıb. Gərgin və maraqlı mübarizə şəraitində keçən həlledici oyunlardan sonra yarışın qalibləri müəyyənləşib.

Turnirin çempionu "J United" komandası olub. Final görüşündə "İdman TV" üzərində 4:0 hesablı inamlı qələbə qazanan kollektiv qızıl medallara və kuboka sahib çıxıb. Komandanın heyətində Oxu.Az-ın əməkdaşı Murad Nəsimi də çıxış edib.

Finalda məğlub olan "İdman TV" turniri ikinci pillədə başa vurub.

Üçüncü yer uğrunda keçirilən qarşılaşmada isə "Xəzər" komandası "CBC Sport"u 8:2 hesabı ilə məğlub edərək bürünc medallara yiyələnib. Beşinci yer uğrunda oyunda "Futbol+" komandası "Media 1875" üzərində 4:1 hesablı qələbə qazanıb.

Oyunlardan sonra təşkil olunan mükafatlandırma mərasimində "Qarabağ" Futbol Klubunun Baş direktoru və İdarə Heyətinin üzvü Emrah Çelikel media nümayəndələrini Milli Mətbuat Günü münasibətilə təbrik edib. O bildirib ki, artıq ikinci dəfə keçirilən bu turnir ənənə halını alır və gələcək illərdə də davam etdirilməsi nəzərdə tutulur.

Mükafatları Emrah Çelikel, klubun İctimaiyyətlə əlaqələr və mətbuat xidmətinin rəhbəri Anar Hacıyev, həmçinin akademiyanın meneceri Nail Kərimov təqdim ediblər. Turnir çərçivəsində xanım idman jurnalistləri üçün təşkil olunmuş xüsusi müsabiqələrin qalibləri də hədiyyələrlə mükafatlandırılıblar.

Fərdi nominasiyalar üzrə "Xəzər" komandasının üzvü Xanoğlan İmanov turnirin ən sərrast oyunçusu seçilərək xüsusi kubokla təltif olunub. "J United" komandasının üzvləri Kamran Quliyev turnirin ən yaxşı oyunçusu, Murad Şirinov isə ən yaxşı qapıçı adına layiq görülüblər.

Qeyd edək ki, "Qarabağ" Futbol Klubunun təşkil etdiyi minifutbol turniri ölkə mediası nümayəndələri arasında həm idman həmrəyliyinin möhkəmləndirilməsi, həm də Milli Mətbuat Gününün qeyd olunması məqsədilə keçirilir.