Prezident İlham Əliyev Milli Məclisin iyulun 14-də qəbul etdiyi Əmək Məcəlləsində, Mülki Məcəllədə, "Valyuta tənzimi haqqında", "Banklar haqqında", "İnvestisiya fondları haqqında" və "Qiymətli kağızlar bazarı haqqında" qanunlara dəyişiklikləri təsdiqləyib.

Yeni qanunla Azərbaycanda ilk dəfə olaraq "İşçilərin pay (səhm) iştirakı planı haqqında müqavilə" anlayışı tətbiq edilir.

Dəyişikliklərə əsasən, şirkətlər işçilərinə müəssisənin pay və ya səhmlərini güzəştli şərtlərlə və ya tam ödənişsiz təqdim edə biləcəklər. Lakin bu hüquq müəyyən şərtlərlə qüvvəyə minəcək. İşçinin paya tam sahib olması üçün onun müəyyən müddət şirkətdə çalışması və ya qarşıya qoyulan biznes hədəflərinə nail olunması tələb oluna bilər.

Qanunda həmçinin qeyd olunur ki, işçi ştat ixtisarı, səhhəti və ya öz istəyi ilə işdən ayrıldığı halda müəyyən pay hüquqlarını saxlaya bilər. Əmək intizamını pozduğu və ya öz təqsiri səbəbindən işdən çıxarıldıqda isə qazanmadığı bütün pay hüquqlarını itirəcək.

Sənədə əsasən, işçilərə verilən pay və səhmlər əməkhaqqı hesab edilməyəcək və əməkhaqqının əvəzi kimi təqdim oluna bilməyəcək.

Eyni zamanda Mülki Məcəlləyə startaplar və investisiya mühitinin inkişafına yönəlmiş yeni mexanizmlər əlavə olunub. Korporativ müqavilələr, birgə satış (Tag-along), məcburi satış (Drag-along), ilk imtina hüququ (ROFR), eləcə də vençur investisiyalarında istifadə olunan SAFE və konvertasiya olunan borc kimi müasir maliyyə alətləri qanunvericilikdə təsbit edilib.

Qanuna əsasən, vençur kapitalı fondları və akkreditə olunmuş investorlar tərəfindən xarici innovativ layihələrə və startaplara investisiya qoyuluşu da Mərkəzi Bankın müəyyən etdiyi qaydalar çərçivəsində həyata keçiriləcək.

Yeni dəyişikliklərin ölkədə innovasiya ekosisteminin inkişafına, startapların maliyyələşdirilməsinə və investisiya mühitinin daha da yaxşılaşdırılmasına töhfə verəcəyi gözlənilir.