Bakı şəhərində fəaliyyət göstərən 94 saylı uşaq bağçası ilə bağlı Qanuntv.az-a daxil olan şikayətlər ciddi narahatlıq doğurur. Qanuntv.az saytının rəhbəri Bəxtiyar Vəliyev narazı valideynlərlə görüş keçirərək onların səsləndirdiyi iddiaları dinləyib.
Valideynlərin iddiasına görə, bağçada təlim-tərbiyə prosesi demək olar ki, formal xarakter daşıyır. Onların sözlərinə əsasən, uşaqların bilik və bacarıqlarının inkişafına lazımi diqqət göstərilmir, gün ərzində səmərəli məşğələlər keçirilmir və məktəbəqədər təhsilin əsas məqsədi arxa plana atılıb.
Şikayətçilər bildirirlər ki, bağçada baş verən nöqsanlar rəhbərliyə dəfələrlə çatdırılsa da, müəssisənin müdiri vəziyyətə müdaxilə etmək əvəzinə bütün bu problemlərə göz yumur. Valideynlərin fikrincə, rəhbərliyin səssiz qalması bağçada yaranmış məsuliyyətsizlik mühitini daha da dərinləşdirir.
Ən acınacaqlısı isə odur ki, söhbət adi bir müəssisədən deyil, ölkənin gələcəyini təşkil edən azyaşlı uşaqların təhsil aldığı bağçadan gedir. Uşaqların inkişafına laqeyd yanaşılması, onların keyfiyyətli məktəbəqədər təhsildən məhrum edilməsi heç bir halda qəbul edilə bilməz. Belə münasibət yalnız valideynlərin deyil, bütün cəmiyyətin narazılığına səbəb olmalıdır.
Əgər səsləndirilən iddialar doğrudursa, aidiyyəti qurumların susması və ya gecikməsi bağçada mövcud problemlərin daha da böyüməsinə şərait yarada bilər. Dövlət məktəbəqədər təhsil müəssisələrinin inkişafı üçün milyonlarla vəsait ayırdığı halda, bəzi rəhbərlərin məsuliyyətsizliyi bu siyasətə kölgə salır.
Qanuntv.az aidiyyəti dövlət qurumlarını 94 saylı uşaq bağçasında səsləndirilən iddiaları təxirəsalınmadan araşdırmağa çağırır. Uşaqların gələcəyi ilə bağlı məsələlərə biganə yanaşmaq yolverilməzdir və səhlənkarlığa yol verən şəxslər qanun qarşısında cavab verməlidirlər.
Qeyd: Yazıda qeyd olunan məlumatlar valideynlərin Qanuntv.az-a təqdim etdiyi iddialara əsaslanır. Qarşı tərəfin mövqeyini dərc etməyə hazırıq.
